स्वास्थ्य तथा जनसंख्या मन्त्रालयले पछिल्लो २४ घण्टामा थपिएको कोरोना संक्रमितको संख्या १९ सय ११ रहेको जनाएको छ । त्यस्तै कोरोनाका पछिल्लो २४ घण्टामा मृत्यु हुनेको संख्या ११ रहेको छ ।

बिहीवार एक सूचना जारी गर्दै स्वास्थ्य मन्त्रालयले १० पुरुष र १ महिलाको मृत्यु भएको जनाएको हो ।

मृत्यु हुनेमा सुनसरीका ५६, ५० र २७ वर्षका तीन पुरुष रहेका छन् । त्यस्तै काठमाडौँका ७८ र ६८ वर्षीय २ पुरुष, भक्तपुरका ६८ वर्षीय पुरुष र ललितपुरका ४८ वर्षीय पुरुष रहेका छन् ।

बांकीकी ३४ वर्षीया महिला, रुपन्देहीका ८०, ८५ र ४२ वर्षीय ३ जना पुरुषको पनि कोरोनाका कारण मृत्यु भएको छ ।

यससँगै नेपालमा कोरोनाका कारण हालसम्म मृत्यु हुनेको संख्या ५ सय ९ पुगेको छ ।

मन्त्रालयले सार्वजनिक गरेको सूचनामा पछिल्लो २४ घण्टामा १२ हजार ४ सय ४४ को पीसीआर परीक्षण गरिएको र तीमध्ये १९ सय ११ मा कोरोना संक्रमण देखिएको छ ।

काठमाडौँ उपत्यकामा संक्रमितको संख्या ९ सय ४३ रहेको छ । काठमाडौँ जिल्लामा ८ सय १७, भक्तपुरमा ५८ र ललितपुरमा ६८ जनामा कोरोना संक्रमण देखिएको हो । यससँगै नेपालमा सक्रिय संक्रमितको संख्या २१ हजार ८ सय ३० पुगेको छ ।

पछिल्लो २४ घण्टामा संक्रमणमुक्त भएर डिस्चार्ज हुनेको संख्या ९ सय ६१ रहेको छ ।

नेपालमा हालसम्म ५७ हजार ३८९ संक्रमणमुक्त भएर घर फर्किसकेका छन् ।