पर्साको वीरगञ्ज महानगरपालिका वडा नं ५ रेशमकोठीबाट अवैध सुन बरामद गरेको छ । विशेष सूचनाका आधारमा प्रहरीले  गणेश अपार्टमेन्टको ३०३ नम्बर फ्लाटमा छापा मारी २३ किलो २५७ ग्राम सुन बरामद गरेको हो ।  सो सुनको मूल्य १७ करोडभन्दा बढी हुन आउँछ ।

भारतको रक्सौलस्थित हरैया निवासी अशोक सिन्हा बस्दै आएको फ्ल्याटमा अवैध सुन राखिएको सूचनाका आधारमा छापा मार्दा एक किलो, सय ग्रामलगायत विभिन्न तौलका २३ किलोभन्दा बढी सुन र दुई किलो २६२ ग्राम चाँदीका भाँडा बरामद गरिएको पर्साका प्रहरी उपरीक्षक गङ्गा पन्तले जानकारी दिइन् ।

 जिल्ला प्रहरी कार्यालय पर्सामा आयोजित पत्रकार सम्मेलनमा पन्तले बन्द फ्ल्याटको दुई दिनसम्म निगरानी गरिए पनि कोही नआएपछि आज जनप्रतिनिधिको रोहबरमा ताल्चा फुटाई जाँच गर्दा उक्त परिमाणका  सुन र चाँदी बरामद भएको बताइन् ।

यसबारे थप अनुसन्धान भइरहेको प्रहरीले जनाएको छ ।