भारतको पूर्वी लद्दाखको चुमार–डेमचोक इलाकामा पक्राउ परेका चिनियाँ सैनिकलाई भारतीय सेनाले फर्काउने घोषणा गरेको भए पनि चिनियाँ सेना आश्वस्त हुन सकेको छैन । 

भारतीय पक्षले आफ्नो वाचा पूरा गर्ने र शीघ्र नै चिनियाँ सैनिकलाई फर्काउने आशा गरेको चिनियाँ सेनाको भनाइ छ । एक सैनिक गोठालाको याक खोज्नका लागि सहायता गर्ने क्रममा राति आफ्नो सैनिक हराएको चिनियाँ सेनाको दाबी छ । 

चिनियाँ सेनाका प्रवक्ता वरिष्ठ कर्नेल झाङ शुइलीले वास्तविक नियन्त्रण रेखामा चिनियाँ जनमुक्ति सेनाका सैनिकहरूले घटना भएलगत्तै भारतीय सेनालाई यसको जानकारी दिएको बताए । शुइलीले भने, ‘भारतीय पक्षले बेपत्ता भएको चिनियाँ सैनिकलाई छिट्टै फर्काउने र सातौं चरणमा भएको कुराकानीपछि बनेको सहमति लागू गर्ने आशा गरेका छौं । यसले गर्दा सीमावर्ती क्षेत्रमा शान्ति कायम हुन्छ ।’

चिनियाँ सैनिक कर्पोरल वाङ लाङलाई भारतीय सेनाले चुमार–डेमचोक इलाकामा पक्राउ गरेको थियो । भारतीय सेनाले बयान जारी गरेर चिनियाँ सैनिक भेटिएको र उसलाई स्वास्थ्य सहायता, खाना, अक्सिजन र न्यानो कपडा उपलब्ध गराएको जानकारी दियो । औपचारिकता पूरा गरेर चिनियाँ सेनालाई सैनिक सुम्पिने पनि उसले बतायो । 

ती चिनियाँ सैनिकसँग नागरिक र सैन्य दस्तावेज रहेको पाइएको भनी खबर पनि आएका थिए । भारतीय सेनाले चिनियाँ सैनिकसँग कुराकानी पनि गरिरहेको छ । 

याकमा गोप्य उपकरण जोडेर चिनियाँ सेनाले भारतीय क्षेत्रमा प्रवेश गरेर जासूसी गरिरहेको हो कि भनी भारतले शंका गरेको छ । भारतीय पक्षले केही दिनअघि मानवीयताको परिचय दिँदै १३ वटा चिनियाँ याक चिनियाँ सीमामा फर्काइदिएको थियो ।