कार्यस्थलमा खटिएका क्रममा बेपत्ता भएका प्रहरी जवान रामबहादुर साउँदको पनि शव फेला परेको छ । 

शनिवार साँझ ८ बजे मोटरसाइकलमा गस्तीमा गएका बेला बेपत्ता भएका उनको शव केहीबेरअघि मात्रै फेला परेको सुदूरपश्चिम प्रदेश प्रहरी कार्यालयका वरिष्ठ प्रहरी उपरीक्षक मुकेशकुमार सिंहले बताए ।

‘मोहना नदीमा डुबिरहेको अवस्थामा प्रहरी जवान साउँदको शव फेला परेको छ,’ वरिष्ठ प्रहरी उपरीक्षक सिंहले भने, ‘अहिले शव निकाल्ने काम भइरहेको छ ।’

सँगै ड्युटीमा निस्किएका प्रहरी नायब निरीक्षक (असई) विक आइतवार बिहान मृत अवस्थामा मोहना नदीमा फेला परेका थिए । उनको अन्त्यष्टि पनि गरिसकिएको छ । 

अनुसन्धानका लागि १६ जना नियन्त्रणमा

अस्थायी प्रहरी पोस्ट जुगेडाका इन्चार्ज प्रहरी सहायक निरीक्षक गोविन्द विक र जवान रामबहादुर साउँदको हत्यामा संलग्न भएको आशंकामा १६ जनालाई प्रहरीले नियन्त्रण लिएको छ ।

अनुसन्धानका लागि १६ जनालाई नियन्त्रणमा लिइएको सुदूरपश्चिम प्रदेश प्रहरी प्रमुख प्रहरी नायव महानिरीक्षक उत्तम सुवेदीले बताए । उनका अनुसार प्रहरी सफलता नजिक छ । ‘घटनामा अन्य पनि संलग्न भएको हुनसक्ने भएकाले थप अनुसन्धान चलिरहेको छ,’ सुवेदीले भने, ‘गहन अनुसन्धान चलिरहेको छ, हामी केही समयमै दोषीमाथि कारबाही गर्छाैं ।’

प्रहरी सहायक निरीक्षक विक धनगढी उपमहानगरपालिका–१० को नेपाल–भारत सीमास्थित मोहना नदीमा विभत्स हत्या गरेको अवस्थामा फेला परेका थिए । जवान साउँदको शव मंगलवार मात्रै फेला परेको छ ।