वायु प्रदूषणका कारण पोहोर साल संसारभरि लगभग पाँच लाख शिशुहरू जन्मेको एक महिनामै मरेको आँकडा सार्वजनिक भएको छ । मर्ने अधिकांश शिशुहरू विकासशील देशका थिए । 

हावामा प्रदूषणका कणहरू फैलिँदा अनि शिशुले त्यसैबाट सास लिँदा यस्ता मृत्यु भएका हुन् । 

अनि यसले गर्भमा रहेका शिशुलाई पनि हानि गर्ने गरेको छ । यसले समयअगावै जन्मने वा जन्मिने तौल कम हुने समस्या पनि ल्याइरहेको छ । शिशु मृत्युदर उच्च हुनुमा यो पनि एक कारक तत्त्व हो । 

मृत्यु भएका पाँच लाख शिशुमध्ये दुईतिहाइ घरभित्रको वायुप्रदूषणका कारण मरेको पाइयो । कोइला, काठ र सुकेको गोबरबाट आउने धूवाँले उनीहरूलाई मारेको भेटिएको हो । 

स्टेट अफ ग्लोबल एयर २०२० प्रतिवेदनमा यो कुरा उल्लेख गरिएको छ । यसले संसारभरि वायुप्रदूषणका कारण हुने स्वास्थ्य समस्या र मृत्युको आँकडा अध्ययन गर्ने गरेको छ । 
 

स्वास्थ्यविद्हरूले वृद्ध र अस्वस्थ व्यक्तिहरूमा खराब वायुको असरका बारेमा वर्षौंदेखि चेतावनी दिँदै आएका छन् तर यसले गर्भमा रहेका शिशुमा पर्ने असरका विषयमा अहिले बल्ल बुझ्न थालेका छन् ।