आस्ट्राजेनेका कम्पनीले गरिरहेको कोरोना खोप परीक्षणमा सहभागी एक स्वयंसेवकको ब्राजिलमा मृत्यु भएको ब्राजिलको स्वास्थ्य निकाय आनभिसाले बुधवार जनाएको छ । 

तर खोपको परीक्षणलाई यसै आधारमा रोक्न नमिल्ने आयोजकहरूले बताएका छन् । खोपकै कारणले ती व्यक्तिको मृत्यु नभएको संकेत यसबाट पाइएको छ । 
 

आनभिसालाई मृत्युको सूचना सोमवार दिइएको थियो । तर खोप परीक्षणको निगरानी गरिरहेको अन्तर्राष्ट्रिय मूल्यांकन तथा सुरक्षा समितिले परीक्षण जारी राख्न सिफारिश गरेको छ । 

ती स्वयंसेवकलाई खोप दिइएको थियो कि प्लासेबो लिइएको थियो भन्ने स्पष्ट छैन । तर एक स्रोतले उनलाई प्लासेबो दिइएको बतायो । स्वास्थ्यको जानकारी गोप्य राख्नुपर्ने भएकाले थप सूचना प्रकाशन गरिएको छैन । 

सहभागीहरूलाई खोप दिने कि प्लासेबो दिने भनेर छुट्ट्याइएको हुन्छ र दुवै समूहलाई स्वतन्त्र रूपमा समीक्षा गरिन्छ । ब्राजिलमा घटनाको मूल्यांकन गरिएपछि मानवीय परीक्षणको सुरक्षाका विषयमा चिन्ता नगर्नुपर्ने पाइएपछि यसलाई जारी राख्ने निर्णय ब्राजिली नियामक संस्थाले जनायो ।

डी ओर इन्स्टिच्युटले ब्राजिलमा खोपको परीक्षण गरिरहेको छ र त्यसमा ८ हजारजना स्वयंसेवीले भाग लिइरहेका छन् ।