प्रमुख प्रतिपक्षी दल नेपाली कांग्रेसको कोभिड १९ अनुगमन समितिले कोभिड १९ को परीक्षण र उपचारमा शुल्क लिने सरकारको निर्णयलाई गैर-जिम्मेवारीपूर्ण भन्दै विरोध गरेको छ ।

महामन्त्री तथा संयोजक डा. प्रकाशशरण महतले एक विज्ञप्ति जारी गर्दै सरकार कोरोना नियन्त्रण र रोकथाममा पूर्णतः असफल भएको निष्कर्षसमेत निकालेको हो ।

डा. महतले जारी गरेको विज्ञप्तिमा भनिएको छ, 'कोरोनाको बढ्दै गएको आँकडाले नेपालमा स्थिति भयावह हुँदै गएको संकेत गर्दछ । तर सरकार देशमा कोभिड—१९ संक्रमण रोक्न सफल भएको दावी गर्दैछ । सरकारको यो भन्दा विरोधाभाष र गैर जिम्मेवारीपूर्ण रवैयाको अर्को नमूना हुन सक्दैन ।'

डा. महतले विज्ञप्तिमार्फत संवैधानिक व्यवस्था र सर्वोच्च अदालतको आदेश विपरीत तथा नेपाली कांग्रेस पार्टी र नागरिक समाजबाट भएको निरन्तर विरोधका वावजुद सरकार कोभिड—१९ संक्रमितको निःशुल्क उपचार गराउनु पर्ने जिम्मेवारीबाट पन्छिएको आरोप लगाए ।

'त्यसमाथि सरकारी अस्पतालहरुले समेत उपचार पहिले नै निश्चित धरौटी रकम दाखिला गर्नु पर्ने सूचना जारी गर्दैछन्,' विज्ञप्तिमा उल्लेख छ, 'यसले गर्दा खर्च जुटाउन नसकेर कतिपय विरामीहरु अस्पतालमा उपचार गराउँदा गराउँदै फिर्ता हुदैछन् भने कतिपय संक्रमणले गम्भीर हुँदा समेत घरमै बस्नु पर्ने वाध्यता भएको छ ।'

उनले सत्ताधारी दलका नेता र उनका नाममा दर्ता भएका गैर सरकारी संघ–संस्थाहरुलाई अरबौं रकम दिन सक्ने, विभिन्न शीर्षकमा फजुल खर्च गर्न समस्या नहुने, कोभिड—१९ संक्रमण रोक्ने नाममा ठूलो मात्रामा दुरुपयोग र भ्रष्टाचार गर्न सरकारसँग पर्याप्त बजेट हुने तर आम नागरिकहरुले परिक्षण र उपचार खर्च नभएर मृत्युवरण गर्नु पर्ने र वेरोजगारीका कारण चाडवाडको बेलामा पनि भोकभोकै बस्नुपर्ने स्थितिमा बजेटको अभाव देखाउँदै सरकार केही गर्न नसक्ने भनेर जिम्मेवारीबाट पन्छिएको आरोप लगाए ।

विज्ञप्तिमार्फत डा. महतले कोरोना रोकथाममा सरकारले देखाएको उदासिनताका कारण बढ्दो संक्रमणलाई कम गर्न आम नागरिकहरुको तहबाट पनि जिम्मेवारी लिन जरुरी भएको बताए ।

'मास्क लगाउने, भौतिक दुरी कायम राख्ने र सावुन पानीले नियमित हाँत धुने उपायहरुलाई गम्भीरताका साथ लिन पनि हामी सबैसँग आग्रह गर्दछौं,' उनले भनेका छन्, 'अन्तमा, कोभिड—१९ संक्रमणको विशिष्ट परिस्थितिमा बडा दशैको चाडलाई आ–आफ्ना घरमा मात्र मनाएर संक्रमणको जोखिमलाई कम गर्न समेत सम्पूर्ण नेपाली दिदीबहिनी तथा दाजुभाइहरुमा नेपाली कांग्रेस आग्रह गर्दछ ।'