प्रमुख प्रतिपक्षी दलका नेता तथा नेपाली काँग्रेसका सभापति शेरबहादुर देउवाले देशमा कोरोनाले सर्वत्र त्रास भएको बेला सरकार जनताको अभिभावकका बन्न नसकेको बताएका छन् ।  
बिहीबार एक विज्ञप्ति जारी गर्दै देउवाले विज्ञप्तिमा भनेका छन्, ‘देशमा सर्वत्र त्रास छ, यस्तो विषम अवस्थामा जनताको अभिभावकका रुपमा उभिनु पर्ने सरकारले झन् पिडा थप्ने काम गरेको छ । नेपाल सरकारले कोभिड–१९ को परीक्षण र संक्रमित नागरिकले उपचारसमेत आफ्नै खर्चमा गर्नुपर्ने भनि गरेको निर्णय निन्दनीय र लज्जास्पद छ ।’

उनले आधारभूत स्वास्थ्य सेवा निःशुल्क प्राप्त गर्नु नागरिकको संवैधानिक एवं कानूनी हक रहेको प्रस्ट पार्दै सरकारले कुनै शर्त बिना यसको कार्यान्वयन गर्नुपर्ने जनाएका छन् ।
देउवाले सरकारले जनताको हित विरुद्ध, लोकतान्त्रिक मूल्य, संवैधानिक र कानूनी व्यवस्था विपरित निर्णय गरि घोर अलोकतान्त्रिक चरित्रको प्रदर्शन र सर्वोच्च अदालतको पनि अपहेलना गरेको भन्दै यस्तो स्थिति आउन नदिन प्रधानमन्त्री केपी शर्मा ओलीलाई सजग समेत गराएका छन् ।