यूएईको राजधाानी अबु धाबीमा एक नेपाली महिलाले तिम्ल्याहा सन्तान जन्माएकी छन् । 

तीस वर्षीया अलिशा सुवाल र उनका तीनै सन्तानको स्वास्थ्य राम्रो छ । पाँच हप्तासम्म शिशु सघन उपचार कक्षमा राखेर अहिले उनीहरूलाई घर पठाइएको छ । 

‘अहिले हामी सुत्न पाएका छैनौं र नियमित तालिका बनाउँदैछौं । धन्य, मेरा पति र मैले कामबाट छुट्टी पाएका छौं र हामीलाई सेटल हुन सजिलो भएको छ,’ सुवालले गल्फ न्युजलाई बताइन् । 

सुवाल र उनका पति विवेक श्रेष्ठको विवाह भएको आठ वर्ष बितेको छ । उनीहरूले जुम्ल्याहा सन्तान जन्मिने अपेक्षा गरेका थिए ।

तर सुवालको गर्भमा तिम्ल्याहा रहेको उनीहरूले कोभिड–१९ चर्किएको बेलामा थाहा पाए । 

‘तीन महिनामा स्क्यान गराउन म एक्लै गएकी थिएँ । अप्रिल महिनामा कोभिड चरममा थियो । चिकित्सकले म तिम्ल्याहाकी आमा बन्न लागेको भन्दा म स्तब्ध भएँ । म डराएको थिएँ अनि उत्साहित पनि थिएँ,’ सुवालले भनिन् । 

‘मेरो खानदानमा तीनथरी जुम्ल्याहा छन् तर तिम्ल्याहा जन्माउने हामी नै पहिलो जोडी हौं,’ श्रेष्ठले भने । 
 

मिडियोर अस्पतालमा प्रसूती तथा स्त्रीरोग विभागका प्रमुख डा वालिद एल शर्बिनीले प्रत्येक ६४ सय गर्भाधानमा एकपटक तिम्ल्याहा सन्तान हुने बताए । जुम्ल्याहा वा तिम्ल्याहा सन्तान जन्मिने इतिहास भएको परिवारमा त्यसको सम्भावना बढी रहने उनको भनाइ छ । 

सुवाल स्थानीय रिटेलरमा रिसेप्सनिस्ट छिन् भने श्रेष्ठ सुरक्षागार्डहरूका प्रमुख हुन् । 

गर्भ रहेको ३१ हप्तामै सुवालले तिम्ल्याहा जन्माएकी हुन् । अगस्ट २९ मा उनीहरूको जन्म भएको हो । शल्यक्रिया गरेर बच्चा जन्माएको तीन दिनपछि नै सुवाललाई अस्पतालबाट छुट्टी दिइयो । 

बच्चाहरूलाई चाहिँ शिशु सघन उपचार कक्षामा राखेर भर्खर मात्र घर पठाइएको हो । समयअगावै जन्मेकाले शिशुहरूको फोक्सो राम्ररी विकसित नभइसकेकाले श्वासप्रश्वासमा समस्या नआओस् भनी उनीहरूलाई सघन उपचार कक्षमा राखिएको थियो । 

जन्मँदा बच्चीहरूको तौल १२ सय ३० ग्राम, १२ सय ८० ग्राम र १३ सय २० ग्राम थियो । 

श्रेष्ठले दिनको धेरैपटक बच्चीहरूलाई दूध ल्याउने गरेका थिए । शल्यक्रियाबाट निको हुँदै गर्दा सुवाल दिनको एकपटक बच्चीहरूलाई हेर्न पुग्थिन् । बच्चीहरू स्वस्थ छन् भन्ने निश्चित भएपछि अक्टोबर महिनाको आरम्भतिर उनीहरूलाई घर पठाइएको हो । 

सुवाल र श्रेष्ठले छोरीहरूको नाम वियाना, अभिलाषा र आरियाना राखेका छन् । उनीहरूको समय बच्चीहरूको स्याहारमा बित्ने गरेको छ । रुँदा फकाउने, भोक लाग्दा खुवाउने र डाइपर बदल्ने काममा उनीहरू व्यस्त रहने गरेका छन् । 

‘हामीसँग अहिले धाई छैनन् तर मेरा रोजगारदाताले मलाई दुई महिनाको छुट्टी दिएका छन् र पत्नी मातृत्व बिदामा छिन् । हामी अहिले कागजात मिलाएर नेपाल फर्किने तयारी गरिरहेका छौं । त्यहाँ हाम्रा मातापिताले केही समयका लागि हेरिदिनुहुनेछ,’ श्रेष्ठले भने । 

सुवालले आफ्ना छोरीहरू यूएईमा हुर्काउन चाहेको बताइन् तर शिक्षादीक्षाको खर्च उठाउन गाह्रो पर्ने बताइन् । ‘म पनि अब काममा फर्किनुपर्ने हुन्छ त्यसैले बच्चा स्याहार्ने काम कसरी गर्ने भनी विचार गर्नुपर्नेछ,’ उनले थपिन् । 

गल्फ न्युजबाट