घरभित्रै परिवारमा सामान्य जमघटसहित दशैं मनाऔं : मेयर शाक्य

काठमाडौं महानगरपालिकाका प्रमुख विद्यासुन्दर शाक्यले दशैंमा हुने जमघट र ओहोरदोहोरले कोरोना संक्रमणलाई थप फैलाउन सहयोग गर्ने भन्दै स्वास्थ्य सुरक्षा मापदण्डको पालना गर्दै परिवार–परिवार बीचमा सामान्य जमघटसहित मनाउन आग्रह गरेका छन् ।

दशैंको अवसरमा शुभकामना सन्देश जारी गर्दै उनले घरभित्रै दशैं मनाउन आग्रह गरेका हुन् ।


Advertisement

‘बडादशैंमा हुने जमघट र ओहोरदोहोरले कोरोना संक्रमणलाई थप फैलाउन सहयोग गर्छ । त्यसैले स्वास्थ्य सुरक्षा मापदण्डको पालना गर्दै बडा दशैंलाई परम्पराको जगेर्ना र पाहुना सत्कारबाट टाढा रही घरभित्रै परिवारका सीमित सदस्यका बीचमा सामान्य जमघटसहित मनाऔं,’ उनले जारी गरेको सन्देशमा भनिएको छ, ‘कोभिड—१९ को महामारीलाई जितेपछि आगामी वर्षको बडादशैं सहितका पर्वलाई विगतका वर्षहरूमा जस्तैै खुशीयालीका साथ स्वतन्त्र भई उल्लासमय वातावरणमा मनाउने नै छौं ।’ 

उनले केही समयदेखि विश्व महामारीको रूपमा फैलिरहेको कोभिड—१९ को कहरले यतिबेला विश्व नै संन्त्रासमय भएको भन्दै नेपाल पनि पछिल्लो समय कोभिड–१९ कारण थप पीडामा गुज्रिएको उल्लेख गरे । ‘यो वर्षको दशैं कोभिड–१९ महामारीका बीचमा मनाउन गइरहेका छौं,’ उनले भने, ‘संघीय राजधानी रहेको काठमाडौं उपत्यका र काठमाडौं महानगरपालिकामा कोभिड–१९ समुदायस्तरमै महामारीको रूपमा फैलिएको अवस्था छ । यसको रोकथाम, नियन्त्रण र उपचारका लागि संघीय सरकार, प्रदेश सरकार सँगसँगै काठमाडौं महानगरपालिका आफ्नो स्रोत, साधन र क्षमताका साथ जुटिरहेको सर्वविदितै छ । यस्तो जटिल परिस्थितिमा उच्च सावधानीका साथ कोभिड–१९ को नियन्त्रण र व्यवस्थापन गर्दै कोरोनाको कहरबाट विजय प्राप्त गर्न सबैलाई शक्ति र आत्मवल प्राप्त होस् भन्ने कामना प्रकट गर्न चाहन्छु ।’  


Advertisement

उनले कोरोना जस्तो अदृष्य सत्रुसँगको लडाइँ एक्ला–एक्लै जित्न सकिन्न भन्दै नागरिकको सार्थक सहयोगबाट मात्रै यो महामारीलाई परास्त सकिने पनि उल्लेख गरेका छन् ।

कोरोना विरुद्धको लडाइँलाई परिणाममुखी बनाउन स्वास्थ्य सुरक्षा मापदण्डलाई पूर्ण पालना गर्दै दिनचर्या अघि बढाउन अपिल गर्दै उनले दशैंको अवसरमा काठमाडौं महानगरबासी तथा स्वदेश/विदेशमा रहेका सम्पूर्ण नेपाली दाजुभाइ तथा दिदीबहिनीमा सुख, शान्ति, समृद्धि, सुस्वास्थ्य, दीर्घायू एंव उत्तरोत्तर प्रगतिको हार्दिक मंगलमय शुभकामना व्यक्त गरेका छन् ।

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्