‘बाबा हजुर दशैंमा कहिले आउने ? मलाई जुत्ता र मोटुपत्लुको झोला ल्याइदिनू है । मामुले भन्नुभएको सारी चाहिन्छ रे !’ 

‘छोरी म अहिले आउन पाउँदिनँ । कोरोनाभाइरस छ । म जुत्ता र झोला पठाइदिन्छु, हस् ।’

फेसबूकको भिडियो कलमा महानगरीय ट्राफिक प्रहरी महाशाखाका प्रहरी जवान सेतु सिंह थापा र ५ वर्षीया छोरीबीचको संवाद हो यो ।

यसपालिको दशैंमा बर्दियाको गेरुवा गाउँपालिका वडा नम्बर ६ स्थित घरमा रहेकी छोरी र परिवारलाई भेट्न उनी जान पाएनन् ।

कोरोनाभाइरस महामारीमा आफ्ना कारण छोरी र परिवारलाई संक्रमण नफैलियोस् भन्ने उद्देश्यले पनि उनी घर जान खासै आकर्षित भएनन् ।

‘छोरीले घर आउनुस् बाबाभन्दा मुटु फुलेर आउँछ, मन कुँडिन्छ तर के गर्नु यस्तो अवस्था छ,’ सेतुले लोकान्तरसँग भने, ‘राष्ट्र सेवकले घर–परिवार भन्न कहाँ पाइन्छ र !’

‘बुवाआमाले बिदा मिलाएर आइज न छोरा भन्नुभएको छ, यस्तो अवस्थामा कसरी जानु ? कोरोनाभाइरसको संक्रमण हुन्छ भन्दा पनि उहाँहरूलाई बुझाउन अप्ठ्यारो छ,’ सेतुले थपे ।

उनले बुवाआमाको हातबाट टीका नलगाएको ३ वर्ष भैसक्यो ।

प्रहरी सेवामा प्रवेश गरेको १२ वर्ष पुग्न लागेको छ । अहिलेसम्म थोरैपटक मात्र उनले बिदा पाएका छन् ।

अघिल्लो–अघिल्लो वर्षको दशैं त सेतुले ड्यूटीमा हुँदा पनि रमाइलो तरिकाले मनाएका थिए । कार्यलय प्रमुख लगायत उच्च तहका प्रहरी अधिकृतको हातबाट टीका लगाएर आशीर्वाद लिएका थिए ।

ड्यूटी बाहेकको समयमा साथीभाइहरूसँग रमाइलो गरेका थिए ।

तर कोरोना महामारीका कारण यसपालिको दशैंमा भने त्यो पनि सम्भव भएन । 

*****
प्रहरी जवान पुष्पा जिसीलाई दशैंमा घर जान असाध्यै मन थियो । तर, उनी यसपालि पनि घर जान पाइनन् ।

प्रहरी सेवामा प्रवेश गरेको ३ वर्ष भयो तर यसबीचमा उनले आफ्ना बुवाआमाको हातबाट टीका लगाउन पाएकी छैनन् ।

सेवा प्रवेशको पहिलो वर्ष तालिमले गर्दा जान पाइनन् । अर्को वर्ष ट्राफिक प्रहरीको तालिमले गर्दा जान पाइनन् भने यो वर्ष कोरोना महामारीले बिथोल्यो ।

‘यो वर्ष दशैंमा घर जानुपर्छ भनेर बिदा साँचेर बसेकी थिएँ, तर कोरोनाका कारण सबै सपना तुहियो,’ पुष्पाले लोकान्तरसँग भनिन् ।

अघिल्ला वर्षहरूमा उनले यसपालिका लागि भाका राखेकी थिइन्, यसपटक पनि आउन पाइनँ भन्नुपर्दा उनको मन चसक्क भएको छ ।

विद्यालय पढ्दाका साथीभाइ पहिले नै गइसकेका छन् । हामीले यस्तो गर्‍यौं, उस्तो गर्‍यौं, तँ आउँदिनस् ? भन्दा उनको मन चसक्क हुन्छ । 

‘साथीभाइले यस्तो उस्तो गर्‍यौं भन्दा भर्खरै जाऊँ जस्तै लाग्छ,’ पुष्पाले लोकान्तरसँग भनिन्, ‘तर के गर्नु राष्ट्र सेवक भएर काम गरेपछि साथीभाइ बुवाआमा भन्न नपाइने रहेछ ।’ 

यद्यपि यस्तो महामारीका बेलामा पनि जनताको सेवामा खटिन पाउँदा भने आफूलाई गर्व नै लागेको उनको भनाइ छ ।

‘यस्तो महामारीको समयमा फ्रन्ट लाइनमा बसेर सेवा गर्न पाएकी छु, त्यसो हिसाबले चाहिँ खुशी नै छु,’ पुष्पाले लोकान्तरसँग भनिन् ।

पुष्पाका दिदी र भाइ पनि प्रहरी सेवामा नै छन् । दिदीको हातबाट टीका लगाएर उनको दशैं बित्दैछ । बुवाआमासँग भने भिडियो कलबाट  आशीर्वाद मात्र ।

कोरोना भाइरसको संक्रमणले गर्दा दशैंमा घर जान नपाउने आफू जस्ता राष्ट्र सेवकलाई आ–आफ्नो ठाउँमा बसेर रमाइलोसँग दशैं मनाउन उनको आग्रह छ ।

कारोना भाइरसको संक्रमणका कारण यसपालि प्रहरीले दशैंमा बिदा पाएनन् । दशैंमा घर जाँदा संक्रमण फैलिने र आफन्तलाई संक्रमण हुने जोखिमका कारण प्रहरी प्रधान कार्यालयले यसपालिको बिदा कटौती गरेको छ ।

*****

ट्राफिक प्रहरीमा कार्यरत असई सरु पञ्चले पनि यसपालि बिदा त पाएकी छैनन्, तर घर भक्तपुरमा रहेकाले ड्युटी सकिएपछि टीका लगाउने उनको योजना छ ।

‘यसपालि दशैंमा बिदा छैन, ड्यूटी सकिएपछि ड्याडीमामुको हातबाट टीका लगाउँछु,’ असई पञ्चले लोकान्तरसँग भनिन् ।