पूर्व प्रधानमन्त्री एवं जसपा संघीय परिषद्का अध्यक्ष डा. बाबुराम भट्टराईले ‘रअ’ प्रमुख सामन्त गोयलसँग सुटुक्क भेटेको चर्चा सामाजिक सञ्जालमा चलेको छ ।

चर्चित लेखक खगेन्द्र संग्रौलाले बुधवार सामाजिक सञ्जाल ट्वीटरमा सन्देश लेख्दै सामन्तले बाबुरामको शरीरमा कोरोना भाइरस सल्काएको टिप्पणी गरेका छन् ।

प्रत्युत्तरमा डा. भट्टराईले कान नछामी कागको पछि लाग्ने देशमा सत्य र न्यायको के अपेक्षा गर्नु भन्दै जवाफ फर्काएका छन् । 

‘खगेन्द्र संग्रौलाजस्ता बौद्धिक व्यक्ति समेत आफ्नो कान नछामी कागको पछि दौडिने देशमा अरूबाट सत्य र न्याय, बुद्धि र विवेकको के अपेक्षा गर्नु ? भीम मल्ल र भीमसेन थापालाई त्यत्तिकै मार्ने मेरो देश ! बीपी र पीएललाई बाँचुञ्जेल दलाल र गद्दार भन्ने र मरेपछि पुज्ने मेरो देश ! अनि हामी पछि नपरे को त ?’ भट्टराईले जवाफी ट्वीटमा लेखेका छन् ।

खगेन्द्र सॅग्रौलाजस्ता बौद्धिक व्यक्ति समेत आफ्नो कान नछामी कागको पछि दौडिने देशमा अरूबाट सत्य/न्याय,बुद्धि/विवेकको के अपेक्षा गर्नु?भीम मल्ल र भीमसेन थापालाई त्यत्तिकै मार्ने मेरो देश! बिपी र पिएललाई बाचुन्जेल दलाल र गद्दार भन्ने र मरेपछि पुज्ने मेरो देश! अनि हामी पछि नपरे को त? https://t.co/JoG2jXLZ7y

— Baburam Bhattarai (@brb1954) October 28, 2020

यसअघि संगौलाले शरीरमा कोरोना भाइरस सल्काए पनि दिमागमा सल्काए कि भन्ने आशंका रहेको टिप्पणी गरेका थिए । ‘डा. बाबुराम भट्टराई रअ प्रमुख सामन्त गोयललाई सुटुक्क भेट्ने, सामन्त गोयल बाबुराम भट्टराईका देहमा सुटुक्क कोरोना भाइरस सल्काउने ! अनि यता बाबुराम आइसोलसनमा, उता सामन्त आइसोलेसनमा । देहमा भाइरस सल्काइनु सामान्य कुरा हो, दिमागैमा भाइरस सल्काए कि भन्ने आशंकाले पो सतायो !’ संग्रौलाले लेखेका छन् ।
भारतीय प्रधानमन्त्री नरेन्द्र मोदीको विशेष दूतको रूपमा गत हप्ता काठमाडौं आएका रअ प्रमुख गोयलले प्रधानमन्त्री केपी ओलीसँग भेटवार्ता गरेका थिए । अन्य नेतासँगको भेटको औपचारिक पुष्टि भएको छैन ।