चलचित्र ‘प्रसाद’ सर्वाधिक हिट चलचित्र हो । यो चलचित्रमा विपिन कार्की, नम्रता श्रेष्ठ, निश्चल बस्नेत लगायतका कलाकारको अभिनय थियो । चलचित्रलाई दिनेश राउतले निर्देशन गरेका थिए ।

तर, दिनेश राउत यो चलचित्रको दोस्रो सिक्वेलबाट भने पछि हटेर अर्कै चलचित्र निर्माणमा लागेका छन् । त्यसपछि निर्माता सुभाष थापाले चलचित्रको निर्देशन चलचित्र लभ डायरिजका निर्देशक सौरभ चौधरीलाई सुम्पिएका छन् ।

यो चलचित्रलाई लिएर सौरभ निकै गम्भीर छन् । सौरभ भन्छन्, ‘हिट चलचित्रको सिक्वेल बनाउने कुरा सामान्य छैन । यसका लागि मैले दिनरात मेहनत गरिरहेको छु ।’

सौरभले अहिले कलाकारलाई दैनिक रुपमा रिहर्सल गराइरहेका छन् । चलचित्रको स्क्रिप्टलाई सुशील पौडेलले लेखेका हुन् ।

चलचित्रमा पुरानै कलाकार रहनेछन् । सौरभले अघिल्लो चलचित्रको तुलनामा विषयवस्तु अझ कठिन र धेरै मेहनत गर्नुपर्ने प्रतिक्रिया दिए ।

उनले थपे, ‘जिन्दगीमा धेरै परिक्षा दिनुपर्छ । यो पनि मेरो एउटा ठूलो परीक्षा हो । यो पास भएको खण्डमा मैले धेरै सानातिना खुट्किला चढ्न सक्नेछु ।’

हाल स्क्रिप्टको काम सकेर निर्माण टिम छायांकनमा जाने अन्तिम तयारीमा छ । चलचित्रको सम्पूर्ण भागको छायांकन बाग्लुङमा हुनेछ । चलचित्रको बजेट २ करोड छुट्ट्याइएको छ ।