लमजुङको सुन्दरबजार नगरपालिका–८ बलिथुङमा एक घर एक धारा जडान गरिएको छ ।

गण्डकी प्रदेश सरकारको ५९ लाख ८५ हजार ८८८ रुपैयाँ र च्वाइस नेपाल जिल्ला शाखा लमजुङको ११ लाख रुपैयाँ आर्थिक सहयोगमा यहाँका ५५ घरमा घरैपिच्छे धारा जडान गरी पानी झारिएको छ ।  

टोलमा खानेपानीको कुनै स्रोत नहुँदा २ घण्टा समय धाउनुपर्ने बाध्यता घरैपिच्छे धारा जडानले सहज बनाएको छ । ७१ वर्षीया आइतमाया नेपालीले भनिन्, ‘हामीलाई गाउँमा धेरै पानीको दुःख थियो । म बूढी मान्छे गाग्रीमा पानी बोकेर टाढाबाटा ल्याउन पनि नसक्ने तर नल्याएर पनि सुख थिएन । अहिले घरमै धारा जडान गरेर पानी आएपछि त धेरै सहज भएको छ ।’
 
उनी मात्र होइन, यहाँका अन्य बूढापाका तथा बालबालिकालाई समेत बढी फाइदा पुगेको छ । सबैले भने जति पानी उपयोग गर्न पाएको स्थानीय बताउँछन् । वडाध्यक्ष कृष्णकान्त अधिकारीले भने, ‘हामीलाई  सबैभन्दा ठूलो आवश्यकता खानेपानीको थियो, अहिले पूरा हुँदा सबैलाई सहज भएको छ ।’

विगतमा यहाँका वासिन्दाले खानेपानी अभावले डेढ–दुई घण्टा टाढा बूढी कुवा, वीरस्वाँरा र बेंसीशहर नगरपालिका–१ नयाँ गाउँसम्म पानी बोकेर ल्याउने गरेका उनले बताए । 

वडाध्यक्ष अधिकारीका अनुसार सो टोलमा मात्र नभई वडाका अन्य स्थान रामदी, अकला र घोक्रेस्वाँरामा एक घर एक धारा जडान भइरहेको छ । रामदीका ८५ घरमा घरैपिच्छे धारा जडान गरी पानी पुर्‍याउनका लागि हाल ५० हजार र २० हजार रुपैयाँको खानेपानी ट्यांकी निर्माण भइरहेको वडाध्यक्ष अधिकारीले बताए ।
 
च्वाइस नेपालले ३५ लाख रुपैयाँको लागतमा घरघरमै धारा पुर्‍याउन लागेको संस्था लमजुङका संयोजक सुकराम दुलालले बताए । अकलाका १६० घरमा च्वाइसले नै ५३ लाख रुपैयाँमा घरैपिच्छे धारा पुर्‍याउने भएको छ । सो घरका लागि १ लाख बराबरको ट्यांकी निर्माण प्रक्रिया अघि बढेको छ ।

प्रदेश सरकारको लगानीमा घोक्रेस्वाँरामा ४७ घरमा घरैपिच्छे धारा जडान तीव्रगतिमा भएको छ । १०–१० हजार रुपैयाँका ३ ट्यांकी निर्माण गरी सो घरमा धारा जडान गरेर पानी लैजाने कार्य अन्तिम चरणमा पुगेको वडाध्यक्ष अधिकारीले बताए ।

प्रदेश सरकारले लिएको लक्ष्य पछ्याउँदै जिल्लाका विभिन्न गाउँ तथा टोलमा एक घर एक धारा अभियान धमाधम लागू भइरहेको छ । प्रदेश सरकारले प्रदेशकै ५ लाख १७ हजार घरमा पानीको धारा पुर्‍याउने लक्ष्य लिएको छ । सोही लक्ष्यअनुसार प्रदेश सरकारले सबै जिल्लामा लगानी समेत गरिरहेको छ ।