महोत्तरीको बर्दिबास स्थित हत्या गरिएको ६ बर्षीया बालिकाको पोस्टमार्टम रिपोर्ट प्रादेशिक अस्पताल जनकपुरले आज प्रहरीलाई लिखित रूपमैं पठाउने तयारी गरेको छ ।

प्रादेशिक अस्पताल जनकपुरका चिकित्सक डा. रामदेब चौधरीको अध्यक्षतामा गठित ६ सदस्यीय मेडिकल बोर्डले नै शबको पोस्टमार्टम (शब परीक्षण) गरेको छ । गत मंसिर ७ गते बर्दिबास नगरपालिका वडा नम्बर १४ निबासी साहिद अन्सारीकी ६ बर्षीया छोरी गुलाबसा खातूनको हत्या गरिएको थियो । 

‘हत्या गरिएका बालिकाको शबको शबपरीक्षणको काम हिजो बिहीबार नै सम्पन्न भएको थियो,’ डा. चौधरीले लोकान्तर सँग भने,‘करीब डेढ घण्टा लगाएर गरिएको शरीरको सम्पूर्ण भागको परीक्षण गरेर मृत्युको कारण पत्ता लगाईएको छ ।’

हत्या किन भएको हो, जबर्जस्ती करणी गरिएको हो वा होईन लगायत बिभिन्न किसिमको परीक्षण गरेर पता लगाउनु पर्ने सम्पूर्ण कुराहरूको लागि प्रमाण सहित पत्ता लागिसकेका कारण भिसेरा ननिकालिएको समेत उनले खुलाए । ‘शरीरमा बिषालु पदार्थ पनि छ की छैन भन्ने कुराको आशंका लागे पछि मात्र भिसेरा निकालेर थप परीक्षणका लागि विधी बिज्ञान प्रयोगशाला काठमाडौंमा पठाउनु पर्ने हुन्छ,’ उनले भने,‘तर, यो घटनामा पत्ता लगाउनु पर्ने कुराहरु त्यसै पत्ता लागेका कारण त्यो गरिरहनु आवश्यक परेन ।’ 

मृत बालिकाको शबलाई अस्पतालको फ्रिजमा राखेको कारण शब परीक्षण गर्न कुनै समस्या नभएको समेत उनले खुलाए । पोस्टमार्टम पश्चात पनि शबलाई फ्रिजमा सुरक्षित राखिएको उनले बताए । ‘मृतक बालिकाको परिवारजनले हाल सम्म सम्पर्क नगरेको तथा शब लिन नआएको कारण हाल सम्म प्रादेशिक अस्पतालको शब गृहमा नै शब सुरक्षित तरिकाले राखिएको छ,’ डा. चौधरीले भने,‘शबपरीक्षणको सम्पूर्ण रिपोर्ट प्रमाण सहित गोप्य रुपमा खामबन्दी गरेर प्रहरीलाई आज जिम्मा लगाउनेछौँ ।’

जिल्ला प्रशासन कार्यालय महोत्तरीका प्रमुख जिल्ला अधिकारी कृष्ण बहादुर कटुवालका अनुसार शबको पोस्टमार्टम हिजो नै सम्पन्न भए पनि किटानी जाहेरी लगायतको काम बाँकी रहेका कारण शब परिवारजनलाई जिम्मा लगाइएको थिएन । तर, अहिले किटानी जाहेरी लेख्ने तथा दर्ता गराउने प्रक्रिया केही बेरमा सम्पन्न भई सके पछि परिवारजनलाई शब जिम्मा लगाइने पहल शुरू भई सकेको उनले बताए । 

बालिका हत्याको आरोपमा महोत्तरीको गौशाला घर भएको अरुण कुमार साहलाई प्रहरीले पक्राउ गरिसकेको छ ।