प्रधानमन्त्री एवं नेकपा अध्यक्ष केपी शर्मा ओलीले कार्यकारी अध्यक्ष पुष्पकमल दाहाल प्रचण्डलाई सरकार ढाल्न भित्रभित्रै खेल खेल्ने गरेको आरोप लगाएका छन् । विरोधी भन्दा चर्को गरी सरकारको विरोधमा उभिएको पनि ओलीको गुनासो छ । 

पार्टीको सचिवालय बैठकमा शनिवार पेश गरेको प्रस्तावमा अध्यक्ष ओलीले प्रचण्डलाई सरकार ढाल्न भित्र भित्र खेल खेलेको आरोप लगाएका हुन । सरकार ढाल्न पार्टी भित्रबाटै चलखेल भएको ओलीले बताउँदै आएका थिए । तर दस्तावेजमा ओलीले किटान साथ सरकार ढाल्न भित्र भित्रै खेल्ने गरेको आरोप लगाएका हुन ।

‘आज फेरि तपाईँ दुईवटा डुङ्गामा खुट्टा राखेर उभिनु भएको छ– सरकारको नेतृत्व गरिरहेको पार्टीको अध्यक्ष हुनुहुन्छ, तर यसको स्वामित्व लिनु हुन्न । विरोधी भन्दा चर्को गरी सरकारको विरोधमा उभिनुहुन्छ, सरकार ढाल्न भित्रभित्रै खेल खेल्नुहुन्छ’ ओलीले भनेका छन् ।

सरकार ढाल्न लागेको आरोप बारे प्रचण्डले १६ गते बस्ने बैठकमा जवाफ दिने उनी निकट स्रोतले जानकारी दियो । शनिवारको बैठकमा प्रचण्डले ओलीको प्रतिवेदनमा दम्भ भरिएको प्रतिक्रिया जनाएका थिए । 
ओलीले प्रचण्डलाई अस्तिरताबादीको आरोप लगाएका छन् । ओलीले प्रचण्डलाई पार्टी एकता भन्दा पहिलेको कुरालाई लिएर लाञ्छना लगाएको भन्दै पूर्व माओवादी खेमाका नेताहरुले असन्तुष्टि जनाएका छन् । 

‘कुनै बेला स्वयं प्रधानमन्त्री हुँदा ‘म प्रधानमन्त्री हुँ कि विद्रोही नेता हुँ, अलमलमा छु’ भनेर अभिव्यक्ति दिनु हुन्थ्यो । त्यो अलमलले तपाईँलाई र खुद नेपालको कम्युनिष्ट आन्दोलनलाई कति क्षति पुर्‍यायो, समिक्षा गर्नुभएकै होला’ ओलीको प्रतिवेदनको ५२ औं नम्बर बुँदामा उल्लेख छ ।

पूर्वमाओवादी पृष्ठभूमिका नेकपा केन्द्रीय सदस्य हिमाल शर्माले प्रचण्डको प्रतिवेदनमा पार्टी एकता भएपछिको कुरा भएपनि ओलीको जवाफमा पुराना कुरा कोट्याइएको गुनासो गरेका छन् । ‘प्रचण्डको प्रतिवेदनमा त पार्टी एकता पछिका कुरा मात्र छन जस्तो लाग्छ ! पुराना कुरा कोट्याउनु त वर्तमानको सवालमा उचित जवाफ नभएर पाना भर्न जस्तो पो देखियो त !’ केन्द्रीय सदस्य शर्माले फेसबुकमा लेखेका छन् ।