स्थानीय पूर्वाधार विकास साझेदारी अनुदान कार्यक्रम अन्तर्गत बागलुङका २ निर्वाचन क्षेत्रका ६० योजनामा बजेट विनियोजन गरिएको छ ।

जिल्लाका १० वटै स्थानीय तहमा सडक, खानेपानी, कृषि, पर्यटन र खेलकुद लगायतका योजनामा बजेट विनियोजन गरिएको हो । विनियोजित योजनामध्ये अधिकांश सडकका योजना छन् ।

स्थानीय पूर्वाधार विकास साझेदारी अनुदान कार्यक्रम अन्तर्गत प्रतिनिधि सभामा प्रत्यक्ष निर्वाचित सांसदको संयोजकत्वमा समानुपातिक सांसद, सम्बन्धित पालिकाका प्रमुख तथा उपप्रमुख, जिल्ला समन्वय समितिका प्रमुख तथा उपप्रमुख समेतको बैठकले योजना बाँडफाँट गरेको हो । कार्यक्रम अन्तर्गतको ८ करोड बजेटमा स्थानीय तहले केही साझेदारी गर्नेछन् ।

विगतका वर्षमा टुक्रे बजेटले उपलब्धि हासिल नहुने भन्दै ४ वटा पालिकामा एकमुष्ट बजेटका योजना बनाएको क्षेत्र नम्बर १ ले यो वर्ष टुक्रे योजनामै बजेट बाँडेको छ । बागलुङ निर्वाचन क्षेत्र नम्बर १ अन्तर्गत बागलुङ नगरपालिकामा ११ योजनामा बजेट विनियोजन गरिएको छ । ११ योजनामध्ये धौलागिरि बहुमुखी क्याम्पसमा इ–लाइब्रेरी, वडा नम्बर १२ मा मदरसा भवन निर्माण र वडा नम्बर ३ मा शहीद पार्क निर्माणको योजना छ भने बाँकी सबै सडक स्तरोन्नतिका योजना छन् । 

जैमिनी नगरपालिकामा ६ वटा योजनामा बजेट विनियोजन भएको छ । दुर्लिबेंसी खेलकूद मैदान र बोर जैदी खेलकूद मैदानबाहेक जैमिनीमा पनि बाँकी योजना सडक स्तरोन्नतिका छन् । काठेखोला गाउँपालिकामा ९ योजनामा बजेट विनियोजन गरिएको छ । जसमध्ये दुग्ध उत्पादन संकलन केन्द्र, शीतभण्डार निर्माण, मदन स्मृति पार्क निर्माण, भीमसेन क्याम्पसको भवन निर्माण र केही सडकको स्तरोन्नतिका योजना रहेका छन् । 

बरेङ गाउँपालिकामा ४ मात्रै योजनामा बजेट विनियोजन गरिएको छ । बरेङमा ३ सडक र १ आमा समूहको भवन निर्माणको योजना छ । क्षेत्र नम्बर १ मा पर्ने स्थानीय तहको साझेदारीमा विविधता छ । बागलुङ नगरपालिकाले ६०, काठेखोलाले १०, जैमिनीले २० र बरेङ गाउँपालिकाले ३० प्रतिशत साझेदारी गर्ने जनाएका छन् । 

निर्वाचन क्षेत्र नम्बर २ अन्तर्गत पर्ने ६ स्थानीय तहमा ३० योजनामा बजेट विनियोजन गरिएको छ । ताराखोला गाउँपालिकाले उपलब्धि देखिने गरी एउटा मात्रै योजनामा स्थानीय पूर्वाधार विकास साझेदारी अनुदान कार्यक्रम अन्तर्गतको बजेट उपयोग गर्ने भएको छ ।

ताराखोलामा सांस्कृतिक संग्रहालय निर्माणका लागि कार्यक्रम अन्तर्गत ५४ लाख रुपैयाँ बजेट विनियोजन गरिएको छ । गाउँपालिकाले अपुग रकम साझेदारी गर्नेछ । गलकोट नगरपालिकामा १० योजना छनोट गरिएका छन् । अधिकांश सडक स्तरोन्नतिका योजना छन् । 

बडीगाड गाउँपालिकामा ९ योजनामा बजेट विनियोजन गरिएको छ । बडीगाडमा विद्यालय भवनदेखि खरको छाना विस्थापन कार्यक्रम प्राथमिकतामा परेका छन् । ढोरपाटन नगरपालिकामा ४ वटा मात्रै योजनामा बजेट विनियोजन गरिएको छ । विद्युत् गृह मर्मत, सडक र खानेपानीका योजना प्राथमिकतामा परेका छन् । तमानखोला गाउँपालिकामा २ योजनामा बजेट विनियोजन गरिएको छ । २ योजना नै सडकका छन् । 

निसीखोला गाउँपालिकामा पहिरो रोकथाम, विद्यालय भवन मर्मत र सडक स्तरोन्नतिका लागि बजेट विनियोजन गरिएको छ । स्थानीय पूर्वाधार विकास साझेदारी अनुदान कार्यक्रम अन्तर्गत निसीखोलामा ४ योजनामा बजेट विनियोजन गरिएको छ । ‘जनताका आवश्यकताका विषयमा छलफल गरेर बजेट बाँडेका छौं,’ प्रतिनिधिसभा सदस्य डा. सूर्य पाठकले भने, ‘विगतका वर्षमा जस्तो यो वर्ष ठूला योजनामा मात्रै बजेट बाँडेर जान सकिएन्, जनताका गुनासा धेरै आए ।’