वाग्मती प्रदेशका मुख्यमन्त्री डोरमणि पौडेलले प्रदेशको १३ वटै जिल्लाका दुर्गम भेगका जनतालाई स्वास्थ्य उपचार सेवामा गुणस्तरीय सेवा दिन अस्पतालको स्तरोन्नति गर्न प्रदेश सरकारले अहिले स्रोतसाधन परिचालन गरिरहेको बताएका छन् ।

उनले मदन भण्डारी स्वास्थ्य विज्ञान प्रतिष्ठानद्वारा हेटौंडा अस्पतालमा निर्मित सघन उपचार कक्ष (आईसीयू) तथा उच्च उपचार कक्ष (एचडीयू) को सोमवार उद्घाटन गर्दै जनतालाई समाजवादप्रति उन्मुख गराउन स्वास्थ्य र शिक्षाको गुणस्तरीय र दक्षजनशक्ति उत्पादनको लागि सरकारले क्रमशः शिक्षण अस्पताल स्थापना गर्दै लाने नीति रहेको बताए । 

मुख्यमन्त्री पौडेलले प्रदेश सरकारको व्यवस्थापनमै भक्तपुर, नुवाकोट र सिन्धुली जिल्ला अस्पतालमा सोमवारैदेखि सघन उपचार कक्ष सेवा सञ्चालनमा ल्याइएको जानकारी दिए ।

उनले संघीय सरकारद्वारा प्रदेशमा अस्पतालको स्तरोन्नति र निर्माणको लागि गरिएको प्रयास अन्तर्गत १३ जिल्लामा ५१ वटा अस्पतालको सोमवार शिलान्यास हुने उल्लेख गर्दै संघीय सरकारले ती अस्पतालको निर्माणको लागि ५८ अर्ब रुपैयाँ अनुदान रकम उपलब्ध गराएको बताए । मुख्यमन्त्री पौडेलले प्रदेशको स्थायी राजधानी हेटौंडाको जनघनत्वलाई मध्यनजर राखी मदनभण्डारी स्वास्थ्य विज्ञान प्रतिष्ठानले हेटौंडामा केही दिनभित्रै ३०० शय्याको शिक्षण अस्पताल निर्माण गर्ने कार्यक्रम रहेको जानकारी दिए । उनले प्रदेश सरकारले शिक्षण अस्पताल निर्माणको लागि ४५ करोड रुपैयाँ रकम बजेट विनियोजन गरेको र अब हेटौंडा अस्पताललाई शिक्षण अस्पतालको रुपमा स्वास्थ्य सेवा प्रदान गर्ने लक्ष्य रहेको बताए ।