गत शनिवारको बैठकले मंगलवार धुम्बाराहीमा बस्ने गरी तय गरेको नेकपा सचिवालय बैठक बालुवाटारमा सरेको छ ।

शनिवार नेकपा प्रवक्ता नारायणकाजी श्रेष्ठले मंसिर १६ गतेको बैठक बालुवाटारमा बस्ने निर्णय भएको सञ्चारकर्मीलाई जानकारी दिएका थिए । तर दिउँसो १ बजे बस्ने बैठक धुम्बाराहीमा नबसेर बालुवाटारमा बस्ने तय भएको नेकपा स्रोतले जनाएको छ ।

नेकपाभित्र अध्यक्षद्वय केपी शर्मा ओली र पुष्पकमल दाहाल ‘प्रचण्ड’ पक्षबीच औपचारिक रूपमै लिखित वादविवाद चर्किएका बेला दिउँसो १ बजे सचिवालय बैठक बस्दैछ । शनिवारको बैठकमा ओलीले अर्का अध्यक्ष प्रचण्डले लगाएका आरोपको जवाफ दिएका थिए । आज मंगलवारको बैठकमा ओलीले लगाएका आरोपको जवाफ प्रचण्डले दिने जनाइएको छ ।

कात्तिक २८ गते बसेको सचिवालय बैठकमा प्रचण्डले ओलीमाथि गम्भीर आरोप लगाउँदै सचिवालयमा प्रस्ताव पेश गरेका थिए । मंसिर १३ गतेको बैठकमा ओलीले ५३ बुँदे जवाफ सहितको प्रतिवेदन पेश गरेका थिए ।

शनिवारको बैठकमा प्रचण्डले ओलीको दस्तावेज दम्भले भरिएको पोको भएको टिप्पणी गरेका थिए । ओलीले प्रतिवेदनमा लगाएको आरोपबारे मंगलवार प्रचण्डले जवाफ दिने पूर्व माओवादीका एक नेताले जानकारी दिए । 

ओली र प्रचण्ड दुवै प्रस्तावमाथि छलफल गरेर स्थायी कमिटी र केन्द्रीय कमिटी बैठकमा लैजानुपर्ने प्रचण्ड र माधव नेपाल समूहको माग छ । ओली पक्षले भने प्रचण्डको प्रस्ताव फिर्ता हुनुपर्ने अडान लिएको छ ।

ओलीले प्रचण्डको प्रस्ताव सचिवालयले खारेज गरेर भदौ १६ गतेको सहमतिमा फर्किनुपर्ने लिखित प्रतिवेदनमा उल्लेख गरेका छन् । 

नेकपा स्थायी कमिटी बैठक मंसिर १८ गते र केन्द्रीय कमिटी बैठक मंसिर २५ गतेदेखि काठमाडौंमा शुरू हुँदैछ ।