नेपाल कम्युनिस्ट पार्टी (नेकपा) सचिवालय बैठकमा अध्यक्षद्वय प्रधानमन्त्री केपी शर्मा ओली र कार्यकारी अध्यक्ष पुष्पकमल दाहाल ‘प्रचण्ड’ले पेश गरेका प्रस्तावमाथि छलफल शुरू भएको छ ।

प्रधानमन्त्री निवास बालुवाटारमा मंगलवार बसेको सचिवालय बैठकमा दुवै प्रस्तावमाथि छलफल शुरू भएको प्रवक्ता नारायणकाजी श्रेष्ठले जानकारी दिए । सचिवालय बैठक भोलि बुधवार दिउँसो १ बजे पुनः बस्नेछ । 

‘दुवै प्रस्तावमाथि छलफल शुरूवात भएको छ, सकिएको छैन । छलफल औपचारिक रूपमा अगाडि बढाउने कार्यका साथसाथै नेताहरूको बीचमा अनौपचारिक संवादको प्रक्रिया अगाडि बढाउने सहमति भएको छ,’ श्रेष्ठले भने, ‘भोलि १ बजे बस्ने गरी बैठक सकिएको छ ।’

मंगलवारको बैठकमा ओली र प्रचण्ड दुवैले धारणा राखेका थिए । ‘२ अध्यक्षका प्रस्तावका साथसाथै पार्टीमा संकटको कारण र त्यसको समाधान र निकासमा छलफल शुरू भएको छ,’ श्रेष्ठले भने, ‘पार्टी एकताको रक्षा गर्दै छलफल अगाडि बढाउने प्रयत्न छ । बैठकमा र अनौपचारिक रूपमा भएका छलफलले नै एउटा निष्कर्ष निकाल्ने छ ।’

गत कात्तिक २८ गते बसेको सचिवालय बैठकमा कार्यकारी अध्यक्ष पुष्पकमल दाहाल ‘प्रचण्ड’ले प्रधानमन्त्री एवं अर्का अध्यक्ष केपी शर्मा ओलीमाथि गम्भीर आरोप लगाउँदै सचिवालयमा एउटा दस्तावेज पेश गरेका थिए । 

प्रचण्डले लगाएका आरोपको खण्डन गर्दै मंसिर १३ गतेको सचिवालय बैठकमा ओलीले ५३ बुँदे जवाफ सहितको प्रतिवेदन पेश गरेका थिए । एकअर्कालाई आक्षेप लगाएर सचिवालयमा पेश गरिएका प्रतिवेदनका कारण नेकपाको विवाद जटिल मोडमा पुगेको छ ।

सचिवालय बैठकलगत्तै नेकपा स्थायी कमिटी बैठक मंसिर १८ गते र केन्द्रीय कमिटी बैठक मंसिर २५ गतेदेखि काठमाडौंमा हुँदैछ । मंसिर १५ गतेदेखि बस्ने भनिएको स्थायी कमिटी बैठक मंसिर ३ गतेको सचिवालय बैठकले १० दिन पर धकेलेको थियो ।