नेकपाको घम्साघम्सी नयाँ मोडमा : सकसमा सचिवालय बैठक

सत्तारूढ दल नेपाल कम्युनिस्ट पार्टी (नेकपा)भित्र देखिएको शक्तिसंघर्षको उत्कर्ष रूप मंगलवार बसेको सचिवालय बैठकमा छताछुल्ल भयो ।

सचिवालयकै एक सदस्यले 'हात हालाहालबाहेक सबै भएको' भन्दै लोकान्तरलाई दिएको प्रतिक्रियाबाट बुझ्न सकिन्छ - नेकपाको दुख आउने दिनमा अझै पीडादायी भएर जानेछ ।


Advertisement

बैठक सकिएपछि प्रवक्ता नारायणकाजी श्रेष्ठले औपचारिक र अनौपचारिक दुवै छलफललाई अगाडि बढाउने सहमति भएको जनाएका थिए । तर बितेका १८ घण्टामा नेताहरूबीच कुनै अनौपचारिक छलफल हुन सकेको छैन ।

सचिवालय बैठक पुनः बुधवार (आज) दिउँसो १ बजे बस्ने कुरा छ । 'भोलि १ बजे बैठक बसौं' भनेर कार्यकारी अध्यक्ष पुष्पकमल दाहाल 'प्रचण्ड'ले भनेपछि ओली यस्तो बैठक बस्न सकिन्न भन्दै उठेका थिए ।


Advertisement

'बैठक बुधवार १ बजे बस्ने तय भएपछि प्रधानमन्त्रीले बैठकमा म आउन सक्दिन भन्नुभएको थियो,' प्रवक्ता श्रेष्ठले लोकान्तरलाई भने, 'त्यसयता अध्यक्षद्वय बीच कुनै माध्यमबाट अनौपचारिक छलफल भएको हुन सक्छ । बैठक आजकै लागि तय हो ।'

तर बालुवाटार स्रोतले भने प्रधानमन्त्री बैठकमा नआउने जनाएको छ । 'लान्छना मात्र लगाउन खोजिने बैठकमा प्रधानमन्त्री उपस्थित हुनुको कुनै अर्थ रहँदैन,' ओलीनिकट एक नेताले लोकान्तरसँग भने ।

सचिवालय बैठकमै ओलीले भनेका थिए, 'अब यस स्थितिमा बहुमत र अल्पमत भन्न खोज्नु भनेको यो जालझेल र षडयन्त्रको कुरा मात्रै हो । यो ‘कू’ को कुरा हो र यो फाटोतर्फको यात्राको ‘प्रस्ताव’ हो ।' 

आफूमाथि कमिटी बैठकमार्फत् 'कू' गर्न खोजिएको भन्दै प्रधानमन्त्री सचिवालय बैठकमा नआउने अडान लिएका हुन् । यद्यपि उनी आउने नआउने विषय १ बजेबाट शुरू हुने बैठकमै थाहा होला । यो समाचार टिपणी लेख्ने बेलासम्म ओली सचिवालय बैठकमा नआउने अडानमा छन् ।

मंगलवारको बैठकमा ओलीले सचिवालय बैठकमा प्रस्तुत प्रचण्डको प्रस्तावमा छलफल हुनै नसक्ने अड्डी लिएपछि प्रचण्डले प्रश्न गरेका थिए, 'प्रस्तावमाथि छलफल हुनु हुँदैन भन्ने तपाईं को हो ? सचिवालयका सबै सदस्यहरूले छलफलको माग गर्ने, तपाईं एक्लैले हुँदैन भन्नुको अर्थ तपाईंमा दम्भ बढिरहेको छ भन्ने हो ।'

बैठकमा महासचिव विष्णु पौडेलले प्रस्तावमाथि छलफल हुनु पर्छ कि पर्दैन भन्नेमा आफ्नो कुनै धारणा नरहेको बताएका थिए भने बाँकी ७ जना सदस्यले प्रस्तावमाथि छलफल शुरू भइसकेको राय दिएका थिए ।

यसअघि कतै नखुलेका मानिएका गृहमन्त्रीसमेत रहेका सचिवालय सदस्य रामबहादुर थापा बादलसमेतले प्रस्तावमाथि छलफल शुरू भइसकेकाले फिर्ता लिनुपर्छ भन्ने तर्क गर्न नमिल्ने बताए ।

बैठकमा प्रधानमन्त्रीनिकट मानिएका नेता ईश्वर पोखरेलले पनि प्रस्तावमाथि छलफल नै नहुने कुरा गलत रहेको बताएका थिए ।

मंगलवार देखिएको तनावसँगै नेकपाको भविष्य पुनः फूटतिर उन्मुख देखिएको छ । अध्यक्ष प्रचण्ड र वरिष्ठ नेता झलनाथ खनाल, माधवकुमार नेपाल, उपाध्यक्ष वामदेव गौतम र प्रवक्ता नारायणकाजी श्रेष्ठले अध्यक्षद्वयको प्रस्ताव छलफल गरेरै उपयुक्त निष्कर्षमा पुग्नुपर्ने अडान छाडेका छैनन् ।

स्थायी कमिटी सदस्य सुवासचन्द्र नेम्वाङले अनौपचारिक छलफलको प्रयास भइरहेको बताए । 'सचिवालय बैठक बुधवार १ बजे तय नै छ, प्रधानमन्त्री आउनु हुँदैन भनेर हल्ला चलाइएको मात्र हो,' नेम्वाङले लोकान्तरसँग भने, 'हिजो र आजको बीचमा केही अनौपचारिक छलफलका प्रयासहरू भएका छन् ।' उनले सहमतिमै विवाद समाधान हुने विश्वास गरे ।

प्रचण्डनिकट एक स्थायी कमिटी सदस्यले ओलीसँग सीमित विकल्प रहेको बताए ।

'कि त बैठकमा उपस्थित भएर आफ्ना कुराहरू राख्नुपर्यो, कि त अध्यक्ष प्रचण्डलगायत अन्य नेताहरूलाई अनुरोध गरेर बैठक केही दिनपछि सार्न सक्नुपर्यो, नत्र भने आफू अनुपस्थित भए पनि बैठकले गरेको निर्णय मान्नुपर्यो,' ती नेताले भने ।

उनका अनुसार यतिबेला प्रचण्ड-नेपाल पक्ष दृढतापूर्वक 'ओली प्रवृत्ति'विरुद्ध संघर्ष गरेर जाने अवस्थामा पुगेको छ । सचिवालय, स्थायी र केन्द्रीय कमिटीमा बहुमत रहेको प्रचण्ड-नेपाल पक्षले ओलीलाई सकेसम्म अध्यक्ष र प्रधानमन्त्री दुवैबाट, नभए कुनै एक पदबाट राजीनामा गराउने अडानमा छ ।

ओलीले भने अल्पमत/बहुमतको खेल नमान्ने, प्रचण्डले लगाएका लान्छनायुक्त आरोपसहितको प्रस्ताव फिर्ता हुनुपर्ने, माफी माग्नुपर्ने लगायतका अडानहरू सार्वजनिक गरेका छन् ।

 

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्