गाँजामाथिको प्रतिबन्ध फुकुवा गर्ने बाटो खुल्दा यी नेपाली सांसद खुशी

लागूऔषधको सूचीमा रहेको गाँजालाई संयुक्त राष्ट्रसंघले औषधीय गुणयुक्त वनस्पतिको सूचीमा राखेपछि प्रतिबन्ध फुकुवा गर्ने बाटो खुलेको भन्दै नेकपाका सांसद तथा पूर्वमन्त्री शेरबहादुर तामाङले खुशी व्यक्त गरेका छन् । 

सामाजिक सञ्जाल फेसबूकमा स्टेटस लेख्दै सांसद तामाङले अब नेपालमै कानून बनाएर प्रतिबन्ध फुकुवा गर्दै नियमनको बाटोमा जानुपर्ने बताएका छन् । यसअघि सांसद तामाङले गाँजामाथिको प्रतिबन्ध फुकाउन र नियमनको कानूनी व्यवस्था गर्न संसदमा गैरसरकारी विधेयक दर्ता गराएका थिए ।

---

Advertisement

---

‘गाँजा खेतीको कानूनी मान्यताको लागि हामीले जुन बहस सञ्चालन गर्दै संसदमा गाँजा खेतीको कानूनी मान्यताको लागि गैरसरकारी विधेयक नै दर्ता गरेका छौं । अब यसको लागि बाटो खुल्ला भएको छ,’ उनले लेखेका छन्, ‘हरेक नेपालीलाई र सिङ्गै राष्ट्रलाई धनी बनाउन सक्ने गाँजालाई अब कानून बनाएर हामी खुल्ला गर्नेछौं ।’

गाँजाको प्रतिबन्ध हटाउनेबारे अन्तर्राष्ट्रिय रूपमै बहस भइरहेका बेला विश्व स्वास्थ्य संगठनले ३ वर्षअघि संयुक्त राष्ट्रसंघलाई पत्र लेख्दै गाँजालाई लागूऔषधको सूचीबाट हटाएर औषधीय गुणयुक्त वनस्पतिको सूचीमा राख्न आग्रह गरेको थियो ।

---

Advertisement

---

राष्ट्रसंघले यसको प्रक्रिया टुंग्याउँदै बहुमतका आधारमा गाँजालाई औषधीय गुणयुक्त वनस्पतिको सूचीमा राखेको हो । नेपालले गाँजालाई लागूऔषधको सूचीबाट हटाउने प्रस्तावको पक्षमा मतदान गरेको थियो ।

संयुक्त राष्ट्रसंघको कमिसन अन नार्कोटिक ड्रगको सचिवालयमा रहेका ५३ सदस्य राष्ट्रमध्ये २७ राष्ट्रले प्रस्तावको पक्षमा मतदान गरेका सांसद तामाङले जनाएका छन् । नेपाल सरकारको निर्णय र आदेशमा जेनेभामा रहेका राजदूत प्रकाशकुमार सुवेदीले पक्षमा मतदान गरेका थिए ।

सांसद तामाङले लेखेका छन्, ‘अब हाम्रो अभियान संसदमा दर्ता भएको कानूनलाई पास गराउन सबै पक्षलाई आह्वान गर्दछु । संयुक्त राष्ट्रसंघले नै अब गाँजा औषधीय गुण भएको वनस्पति र यसबाट मानव जीवनलाई हानी हुँदैन भनिसकेपछि अब यसको प्रतिबन्ध फुकाउन हामीलाई अवसर प्राप्त भएको छ । यो अवसरको उपयोग गर्दै अब छिटोभन्दा छिटो कानून पास गरेर गाँजा प्रतिबन्ध फुकुवा गरौं ।’