भारतको राजधानी दिल्लीमा किसानहरुले आन्दोलन शुरु गरेको ९ दिन भएको छ । उनीहरुले आफूहरुको माग पूरा नहुँदासम्म आन्दोलन जारी राख्ने बताएका छन् । शुक्रबार दिल्लीको सीमामा किसानले आफ्नो माग राखेर जम्मा भएका छन् ।

साथै आन्दोलनस्थलबाट कुनै पनि हालतमा नहट्ने अडान लिएका छन् । केन्द्र सरकारले ल्याएको नयाँ कृषि कानुनको विरोधमा भारतका किसान आन्दोलित बनेका हुन् । 

यसैबीच शुक्रबार किसानले कृषि कानुन खारेजीको माग गर्दै सडकमै हवन शुरु गरेका छन् । चौतर्फी दवावका लागि सडकमै हवन शुरु गरेको आन्दोलनरत किसानले बताएका छन् ।

हवनका लागि युवतीलाई साथमा राखेका छन् । त्यसको चारैतर्फ हवन सामग्री राखिएको तस्वीरमा देख्न सकिन्छ । यसैबीच आन्दोलनलाई उग्र रुप दिन किसानले सडकमै खाने, त्यही सुत्न शुरु गरेका छन् ।

४ देखि ६ महिनाको राशन साथमा लिएर आएको आन्दोलनरत किसानको भनाइ छ । नयाँ कानुन रद्द नहुँदासम्म गाउँ नफर्किने उनीहरुको अडान छ ।

दिल्ली आवातजावत गर्नका लागि विकल्प खोज्न यात्रुलाई किसानले अनुरोध गरेका छन् ।