प्रमुख प्रतिपक्षी दल नेपाली कांग्रेसले मङ्सिर २९ गते देशव्यापी प्रदर्शन गर्ने भएको छ ।

शुक्रवार बसेको कांग्रेस पदाधिकारीको बैठकले देशभरि प्रदर्शन गर्ने निर्णय गरेको हो ।

पार्टीका वरिष्ठ नेता रामचन्द्र पौडेलमाथि बुधवार प्रशासनले गरेको दुर्व्यवहारका बारेमा छलफल गर्न बसेको पदाधिकारी बैठकले सरकारविरुद्ध आन्दोलन गर्ने निष्कर्ष निकालेको हो ।

कांग्रेस सह-महामन्त्री प्रकाशशरण महतले देशव्यापी रूपमा बढेको भ्रष्टाचार, कोरोनाको असफल व्यवस्थापन र ठाउँ-ठाउँमा भइरहेका दमनका विरुद्धमा कांग्रेस सडकमा आउने जानकारी दिए ।

'आजको पदाधिकारी बैठकले दुई वटा निर्णय गरेको छ,' महतले लोकान्तरसँग भने, 'पहिलो मङ्सिर २९ गते ७७ वटै जिल्लामा देशव्यापी प्रदर्शन गर्ने र दोस्रो संसदको अधिवेशन माग गर्ने ।'

केही साताअघि बसेको बैठकले पनि संसदको विशेष अधिवेशन माग गर्ने निर्णय गरेको थियो ।

अहिले विशेष भनेर कुनै निर्णय नभएको तर अधिवेशन माग गर्ने मात्र निर्णय भएको महतले लोकान्तरलाई बताए ।