कोभिड–१९ को खोप बनाइरहेको अमेरिकी कम्पनी नोभाभ्याक्सले बाँदरहरूमा गरेको परीक्षण सफल भएपछि मानिसलाई पनि खोपले काम गर्ने आशा प्रकट गरेको छ ।

आफ्नो खोपले रिसस मकाक बाँदरहरूबीच संक्रमण रोकेको नोभाभ्याक्सले जानकारी दियो ।

अब यस्तै असर मानिसमा पनि पर्छ कि पर्दैन भनी उसले अध्ययन गर्ने भएको छ । कोरोना महामारी अन्त्यका लागि यसबाट सहयोग पुग्ने देखिएको छ ।

‘मानिसमा पनि त्यस्तै असर देखिने हो भने खोप सफल हुने थियो,’ नोभाभ्याक्सका अनुसन्धान तथा विकास अध्यक्ष डा ग्रेगोरी ग्लेनले बताए ।

बाँदरमा परीक्षण सफल भएको कुरा उत्साहवर्धक भए पनि सतर्कता अपनाउनुपर्ने वैज्ञानिकहरूले बताए । बाँदर मानिसमा भाइरसले बेग्लै असर पार्ने भनी उनीहरूले चेतावनी दिए ।

छिटो र सबभन्दा प्रभावकारी खोप बनाउने दौड निकै तीव्र बनेको छ । बेलायतको एस्ट्राजेनेका र अक्सफोर्ड विश्वविद्यालयले गरिरहेको परीक्षणको ताजा परिणाम केही दिनमै सार्वजनिक गरिने अपेक्षा छ ।

अमेरिकाका फाइजर र मोडर्ना कम्पनीहरूको खोपले मानिसलाई बिरामी हुनबाट जोगाएको देखिएको छ । तर खोप लगाएपछि अरूलाई कोभिड सार्नबाट त्यसले रोक्छ कि रोक्दैन भन्ने कुरा निर्क्योल गर्न पर्याप्त आँकडा उपलब्ध छैन ।