– रुसले कोभिड–१९ विरुद्ध खोप अभियान सुरु गरेको छ । कोभिड–१९ का कारण उच्च जोखिममा रहेका मानिसलाई राजधानी मस्कोका क्लिनिकहरूमा खोप दिइन थालिएको हो ।

रुसमा निर्मित स्पुतनिक–५ खोप गत अगस्टमा दर्ता गरिएको हो । खोपको विकासमा संलग्न वैज्ञानिकहरूले उक्त खोप ९५ प्रतिशत प्रभावकारी रहेको तथा यसको प्रयोगबाट कुनै उल्लेख्य नकारात्मक प्रभाव नदेखिएको बताएका छन् । तर उक्त खोपको अझै सामूहिक परीक्षण भइरहेको छ । कोभिड–१९ बाट जोगिन उक्त खोप दुईपटक लगाउनुपर्छ । अधिकारीहरूका अनुसार पहिलो खोप लिएको तीन सातापछि दोस्रो खोप दिइन्छ ।

राजधानी मस्कोमा खोपको पहिलो डोज लिन हजारौं सर्वसाधारणले आफ्नो नाम दर्ता गराइसकेका जनाइएको छ । तर रुसको उत्पादन क्षमता के–कति छ भन्नेबारे केही उल्लेख गरिएको छैन । उत्पादकहरूले यो वर्षको अन्त्यसम्ममा खोपको २० लाख मात्रा मात्रै उत्पादन गर्न सक्ने अपेक्षा गरिएको छ । तर रुसी राष्ट्रपति भ्लादिमिर पुटिनका अनुसार आगामी ६ साताभित्र सम्पूर्ण नागरिकलाई खोपको पहिलो मात्र दिइसकिनेछ ।

नगर प्रमुख सर्गे सोब्यानिनका अनुसार मस्कोका विद्यालय, स्वास्थ्य क्षेत्र अनि सामाजिक कार्यमा संलग्न मानिसलाई खोप दिइँदै छ । खोपको थप मात्रा उपलब्ध हुँदै गर्दा खोप लिन इच्छुक मानिसको सूची पनि बढ्दै जाने उनले बताए । मस्कोमा मात्रै १ करोड ३० लाख जनसंख्या छ ।

खोप लिन योग्य ठहर्‍याइएका १८ देखि ६० वर्षका मानिसले सहरका ७० स्थानमा रहेका क्लिनिकहरूमा निःशुल्क सुविधाका लागि अनलाइन सेवामार्फत नाम दर्ता गर्न पाउने व्यवस्था मिलाइएको छ । खोप लिने केन्द्रहरू स्थानीय समयानुसार बिहान ८ बजेदेखि साँझ ८ बजेसम्म खुला रहनेछन् ।

पछिल्लो ३० दिनमा कुनै अन्य खोप लिएका वा श्वासप्रश्वासमा समस्या भएकाहरूलाई कोभिड–१९ विरुद्धको खोप नदिइने जनाइएको छ । त्यसैगरी, दीर्घरोगी, गर्भवती र स्तनपान गराइरहेका महिलालाई पनि खोप लगाइँदैन ।
रुसमा कोभिड–१९ संक्रमितको संख्या २४ लाख ३२ हजारभन्दा बढी छ । भाइरसका कारण हालसम्म ४२ हजार ७ सय जनाले ज्यान गुमाइसकेका छन् । अधिकारीहरूका अनुसार शनिबार एकै दिन रुसमा २८ हजार ६ सय ८४ संक्रमित थपिएका छन् । राजधानी मस्कोमा शनिबार करिब ८ हजार संक्रमित थपिएका जनाइएको छ । पछिल्लो समय संक्रमण झन् थपिँदै गएसँगै अस्पतालहरू कोभिडका बिरामीले भरिएका छन् ।

अमेरिकामा खोप अनिवार्य नगरिने
अमेरिकाको राष्ट्रपतिमा निर्वाचित जो बाइडेनले कोभिड–१९ विरुद्धको खोप लिन नागरिकलाई बाध्य नबनाइने बताएका छन् । आफ्नो घरबाहेक बन्दकोठा भएका जुनसुकै स्थानमा मास्क लगाउन सेन्टर फर डिजिज कन्ट्रोल (सीडीसी) ले पहिलोपटक आग्रह गरेपछि बाइडेनले यस्तो बताएका हुन् । सीडीसीले अमेरिका कोभिड–१९ को संक्रमण दर उच्च रहने समयमा प्रवेश गरेको बताएको छ ।

अमेरिकामा शुक्रबार मात्रै भाइरसका कारण २ हजार ५ सय संक्रमितको मृत्यु भएको थियो भने झन्डै २ लाख २५ हजार संक्रमित थपिएका थिए । अमेरिकामा शनिबार साँझसम्म १ करोड ४३ लाख ७५ हजार जना कोभिड–१९ बाट संक्रमित भइसकेका छन् । २ लाख ८० हजारभन्दा बढीले ज्यान गइसकेका छन् ।

नोभेम्बर ३ मा भएको चुनावमार्फत राष्ट्रपतिमा निर्वाचित जो बाइडेनले जनवरी २० मा पदभार ग्रहण गर्दै छन् । उनको शपथ ग्रहण समारोहमा ठूलो भीड नहुने अपेक्षा गरेको बाइडेनले बताएका छन् ।

कोभिडविरुद्धको खोप विकास गरेका फाइजर र मोडर्नाले खोप वितरणको अनुमति माग गर्दै फुड एन्ड ड्रग एड्मिनिस्ट्रेसनमा आवेदन दिइसकेका छन् । क्लिनिकल परीक्षणका क्रममा आफूले विकास गरेको खोप ९५ प्रतिशत प्रभावकारी देखाएको फाइजरले जनाएको छ । त्यस्तै खोप ९४ प्रतिशत प्रभावकारी रहेको मोडर्नाको दाबी छ ।

फाइजरले निर्माण गरेको खोपले बेलायतमा भने सार्वजनिक प्रयोगका लागि बुधबार अनुमति दिइसकिएको छ । अमेरिकी उपराष्ट्रपति माइक पेन्सले एक साताभित्र अमेरिकाले कोभिड–१९ विरुद्धको खोप प्रयोगका लागि अनुमति दिने विषयमा टुंगो लागिसक्ने जनाएका छन् ।

पिउ रिसर्च सेन्टरले गरेको एक अनुसन्धानमा करिब ६० प्रतिशत अमेरिकीहरू मात्रै कोभिडविरुद्धको खोप लिने मनस्थितिमा रहेका देखिएको छ । उक्त संख्या गत सेप्टेम्बरमा ५० प्रतिशतको हाराहारीमा थियो ।
बाइडेनले खोपबारे व्यक्त गरिएका सम्भावित चिन्ता कम गराउने पहलस्वरूप आफू सार्वजनिक रूपमा खोप लिन तयार रहेको बताएका थिए । त्यस्तै पूर्वराष्ट्रपतिहरू बाराक ओबामा, जर्ज डब्लू बुस र बिल क्लिन्टनले पनि आफूहरू सार्वजनिक रूपमा खोप लिन तयार रहेको जनाइसकेका छन् ।कान्तिपुर दैनिकमा खबर छ ।