आइतवार अकस्मात डाकिएको मन्त्रिपरिषद् बैठक जम्माजम्मी २५ मिनेट बस्यो ।

संसद् विघटन गर्ने प्रधानमन्त्रीको तयारीका बारेमा मन्त्रीहरू जानकार थिएनन् ।

मन्त्रीहरूलाई बैठकका लागि भनेर साढे ९ बजेको समय दिइएको थियो । सबै मन्त्रीहरू बालुवाटार पुगे ।

प्रधानमन्त्रीले अध्यादेश फिर्ताको प्रक्रिया शुरू गर्न बैठक मन्त्रिपरिषद् बैठक बोलाएका होलान भन्नेमा मन्त्रीहरू विश्वस्त थिए ।

बैठकमा जानुअघि एक मन्त्रीले लोकान्तरसँग कुरा गर्दै भनेका थिए, 'आज त्यही अध्यादेश फिर्ताको सिफारिश गर्न बोलाइएको हुनुपर्छ ।'

बैठक शुरू हुनेबित्तिकै संवैधानिक परिषदसम्बन्धी अध्यादेश फिर्ताको निर्णय भयो । यतिबेलासम्म मन्त्रीहरू चुप बसेका थिए ।

त्यसपछि ओलीले भने, 'ल साथीहरू ताजा जनादेशका लागि अघि बढ्नुपर्‍यो । संसद् विघटन गर्ने र वैशाखमा चुनाव गर्ने !'

त्यसपछि मन्त्रीहरू मुखामुख गर्न थाले । ओलीले मुख्यसचिवलाई त्यही अनुसारको भाषा माइन्युटमा लेख्न लगाए ।

केही मन्त्रीहरूले प्रतिवाद गर्ने प्रयाससमेत गरेका थिए । मन्त्रीहरूमध्ये वर्षमान पुन, घनश्याम भुसाल, योगेश भट्टराई र प्रदीप ज्ञवालीले पार्टीभित्र छलफल गरौँ, अहिल्यै यस्तो निर्णय नगरौं भने, तर ओलीले उनीहरूको कुरा सुनेनन् ।

प्रधानमन्त्री ओली बिहानैदेखि अलि थाकेका र गलेका जस्ता देखिन्थे । उनले शनिवार बेलुकादेखि नै संसद् विघटनका बारेमा आफूनिकट नेता र कानूनविदसँग सल्लाह गरेका थिए ।

'प्रधानमन्त्री यो निर्णयमा पुगिहाल्नु भएको छैन होला भन्ने हाम्रो अनुमान थियो,' ओलीनिकट मानिने एक मन्त्रीले लोकान्तरसँग भने, 'तर अन्त्यमा संसद विघटनको सिफारिस भयो ।'

बैठक जम्माजम्मी २५ मिनेट मात्र बस्यो । बैठकका निर्णयहरू माइन्युट गर्न लगाएर प्रधानमन्त्री ओली निर्णयसहित अन्य केही फाइल बोकेर कक्षबाट बाहिरिए ।

त्यसपछि बालुवाटारमै ओलीलाई कुरिरहेका नेकपाका कार्यकारी अध्यक्ष पुष्पकमल दाहाल 'प्रचण्ड'सँग ओलीको छोटो भेट भयो ।

भेटमा प्रचण्डले यति धेरै अविश्वास किन ? भनेर सोधेका थिए ।

ओलीले तपाईंहरूले मलाई साथ नदिने भएपछि मैले चाल्नुपर्ने कदम नै यही हो भनेर आफ्नो कदमको प्रतिवाद गरे ।

बाहिर कुरिरहेका प्रचण्डलाई भित्रका मन्त्रीहरूले नै पल-पलमा म्यासेज गरेर घटनाक्रमका बारेमा जानकारी गराएका थिए ।

ओली शितलनिवासतिर लागेपछि प्रचण्ड आफ्नो निवास खुमलटार फर्के । उनले तत्कालै आफूनिकट नेताहरूलाई फोनमा ओलीले 'कू' गरेको ब्रिफिङ गरे ।

त्यसपछि खुमलटारमा प्रचण्ड, वरिष्ठ नेताद्वय झलनाथ खनाल र माधवकुमार नेपाल लगायतका नेताहरू जम्मा भएका थिए ।

फाइल बोकेर ओली राष्ट्रपति कार्यालय शितलनिवासतिर लागे । करीब डेढ घण्टा राष्ट्रपति कार्यालयमा बिताएर ओली बालुवाटार फर्किसकेका छन् ।

राष्ट्रपति कार्यालयबाट मन्त्रिपरिषद् बैठकले गरेको सिफारिश यो समाचार टिप्पणी लेख्नेबेलासम्म अनुमोदन भएको छैन ।

आजै नेकपाको स्थायी कमिटी बैठक बस्ने कार्यतालिका थियो । ओलीको हठात् निर्णयले बैठक अनिश्चित बनेको छ ।

तर केही नेताहरू बालुवाटार पुगेका छन् । बैठक बस्छ या बस्दैन भन्ने कुनै निश्चित नभएको नेताहरूले जनाएका छन् ।