ओली समूहको नेकपा पनि सडक कब्जाकै रणनीतिमा !

प्रधानमन्त्रीसमेत रहेका नेकपाका एउटा समूहका अध्यक्ष केपी शर्मा ओलीले अर्को समूहका अध्यक्ष पुष्पकमल दाहाल 'प्रचण्ड' र माधवकुमार नेपालतर्फ इंगित गर्दै केही दिनअघि बबरमहलस्थित एक पार्टी प्यालेसमा भनेका थिए, 'केही सिट जित्नुछ भने चुनावको तयारीमा लाग्नुस्, चिसोमा सडकको अलकत्रामा गएर नबस्नुस् ।'

ओली मात्र होइन, ओलीनिकट नेताहरूले पनि प्रचण्ड र नेपालको हैसियत सडकमै बस्ने खालको रहेको भन्दै कटाक्ष गर्न छाडेका छैनन् । तर पछिल्ला केही दिनहरूमा नेकपाको ओली समूहले पनि सडककै साथ सहयोग खोजिरहेको छ ।


Advertisement

पुस ५ गते प्रतिनिधि सभा विघटन गरेर ताजा जनादेशका निम्ति वैशाख १७ र २७ गते चुनाव गर्ने घोषणा गरिएपछि नेकपा राजनीतिक रूपमा दुई चीरा भएको थियो । निर्वाचन आयोगबाट अहिलेसम्म कुनै पनि समूहले आधिकारिकता प्राप्त गरिसकेको छैन तर दुई चीरा भएको नेकपालाई मूलतः ओली र प्रचण्ड-नेपाल समूह भनेर चिनिने गरिन्छ ।

संसद विघटन गैरसंवैधानिक भएको भन्दै नेकपाको प्रचण्ड-नेपाल समूहले विभिन्न ठाउँमा आन्दोलन गरिरहेका छन् । प्रतिपक्षी दल नेपाली कांग्रेस, जनता समाजवादी पार्टी र अन्य दलहरूले पनि संसद भंग गर्ने ओलीको कदमको विरोध गरिरहेका छन् ।


Advertisement

शुक्रवार मात्र सर्वोच्च अदालतका ४ पूर्व प्रधानन्यायाधीशहरूले विज्ञप्ति निकाल्दै संसद विघटन असंवैधानिक रहेको जिकिर गरेका थिए ।

सरकारका विरुद्धमा दिनदिनै आन्दोलन र प्रदर्शनका कार्यक्रमहरू हुन थालेपछि प्रधानमन्त्री ओलीले आफ्ना नेता कार्यकर्तालाई पनि सडकमै उत्रिन निर्देशन दिएका छन् । शनिवार मात्र ओली समूहले आधा दर्जन कार्यक्रमहरू आयोजना गरेको छ ।

कहाँ कस्ता कार्यक्रम छन् ?

शनिवार मात्र ओली समूहले आधा दर्जन जति कार्यक्रम गरिरहेको छ, ती मध्ये केही पार्टी प्यालेसहरूमा गरिएका छन् भने अधिकांश सडकमै गरिएका छन् । प्रदेश २ बाट युवाहरू झिकाएर ओली पक्षले काठमाडौँमा धोती जुलुशसमेत गरिरहेको छ । माइतीघर मण्डलाबाट निस्किने धोती जुलुश प्रज्ञा भवनमा ओलीको सम्बोधनसँगै सकिनेछ ।

त्यस्तै शनिवार नै राष्ट्रिय युवासंघका ओलीनिकट कार्यकर्ताहरूले भक्तपुरमा मोटरसाइकल र्याली गरिरहेका छन् । भक्तपुरको नेकपा पार्टी कार्यालयबाट शुरू भएको मोटरसाइकल र्याली काठमाडौँमा ल्याएर टुंग्याउने कार्यक्रम रहेको छ ।

गृहमन्त्री रामबहादुर थापा 'बादल'लाई प्रमुख अतिथि बनाएर काठमाडौँ क्षेत्र नम्बर ३ का ओलीनिकट कार्यकर्ताहरूको क्षेत्रस्तरीय जोरपाटीमा भेला भइरहेको बादलनिकट स्रोतले दाबी गरेको छ भने आजै काठमाडौँको १५ नम्बर वडा कमिटीले शिक्षामन्त्री कृष्णगोपाल श्रेष्ठको प्रमुख अतिथि बनाएर कार्यकर्ता भेला गरेको छ ।

राष्ट्रिय युवा संघको बागमती प्रदेश कमिटीका ओलीनिकट नेता कार्यकर्ताहरूलाई आज ओलीले प्रज्ञा प्रतिष्ठानमा सम्बोधन गर्ने कार्यक्रम रहेको छ भने अपराह्न १२ बजे स्वयम्भूमा नागार्जुन नगर कमिटीले पनि अगुवा कार्यकर्ता भेला गरिरहेको छ ।

त्यस्तै अर्थमन्त्रीसमेत रहेका महासचिव विष्णु पौडेललाई प्रमुख अतिथि बनाएर ओलीनिकट नेकपाको लुम्बिनी प्रदेशस्तरीय कार्यकर्ता भेला भइरहेको पौडेलनिकट स्रोतले जानकारी दिएको छ ।

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्