ललितपुरको बाग्मती गाउँपालिका–४ प्युटारस्थित खयरघारी खेल मैदानमा ‘गाउँपालिका अध्यक्ष कप फूटबल प्रतियोगिता २०७७’ शुरू भएको छ ।

‘स्वास्थ्यका लागि खेलकूद, राष्ट्रका लागि खेलकूद’ भन्ने मूल नाराका साथ गाउँपालिकाकै आयोजनामा शनिवारदेखि आउँदो बुधवारसम्म ५ दिन खेल सञ्चालन हुनेछ । 

कार्यक्रमको उद्घाटन गर्दै गाउँपालिकाका अध्यक्ष वीरबहादुर लोप्चनले प्रतियोगितामा १४ समूहका खेलाडीले भाग लिने बताए ।

उनले भने, ‘युवालाई खेलकूदको माध्यमबाट अघि बढाउन गत वर्षबाटै हामीले यस कामको थालनी गरिसकेका छौं ।’ खयरघारी खेल मैदान गाउँपालिकाको प्रमुख मैदान भएको हुँदा आर्थिक वर्ष २०७६/७७ मा १५ लाख रुपैयाँ विनियोजन गरी सुधारका काम गर्नुका साथै आउँदो आर्थिक वर्षमा पनि केही बजेट विनियोजन गरेर सुविधासम्पन्न मैदान बनाउने योजना रहेको उनको भनाइ छ । 

गाउँपालिकाका उपाध्यक्ष रञ्जना तिमिल्सिनाले गाउँपालिकाले आयोजना गरेका खेलमा सहभागी हुने खेलाडीको एक झुण्ड बनाई विभिन्न स्थानमा समेत खेलाउन लैजाने धारणा व्यक्त गरे । उनले भने, ‘खेलकूदको माध्यमबाट गाउँपालिकामा रहेका युवा क्लबका भाइबहिनीको क्षमता विकास गर्नेछौं ।’ 

गाउँपालिकाले खेलकूदका सामग्री समेत वितरण गर्ने गरेको उपाध्यक्ष तिमिल्सिनाले जानकारी दिए ।

शनिवार भएको खेलकूद प्रतियोगिताको शुभारम्भ योङ ब्रदर्श फूटबल क्लब गिम्दी र छोग्रे युवा फुटबल क्लब प्युटारबीच हुनेछ । प्रतियोगितामा प्रथम हुने समूहले पदक प्रमाणपत्रसहित १ लाख रुपैयाँ, दोस्रोले ५० हजार रुपैयाँ, तेस्रोले २५ हजार रुपैयाँ प्राप्त गर्ने गाउँपालिकाले जनाएको छ ।