प्रतिनिधि सभा विघटनविरुद्धका रिटहरूमाथिको सुनुवाइका क्रममा न्यायाधीश सपना प्रधान मल्लले आफूसँग बहुमत रहेकाले वैकल्पिक सरकार बन्ने अवस्था नै थिएन भनेर प्रधानमन्त्री केपी शर्मा ओलीले गरेको दाबीका सम्बन्धमा प्रश्न गरेकी छन् ।

रिट निवेदकका तर्फबाट संविधानविद् भीमार्जुन आचार्यले बहस गरिरहेका बेला न्यायाधीश मल्लले यस्तो प्रतिप्रश्न गरेकी हुन् ।

'आफूसँगै बहुमत रहेकाले वैकल्पिक सरकारको अवस्था नै थिएन भन्ने प्रधानमन्त्रीको दाबी छ । त्यो अवस्थामा प्रधानमन्त्रीले संसद् फेस गर्नुपर्ने हो कि होइन ?' मल्लले प्रश्न गरिन् ।

प्रतिनिधि सभा विघटनविरुद्ध परेका रिटहरूमाथि सर्वोच्चको संवैधानिक इजलासमा सुनुवाइ भइरहेको छ ।

प्रधानन्यायाधीश चोलेन्द्र शमशेर जबरा नेतृत्वको संवैधानिक इजलासमा न्यायाधीशहरू विश्वम्भरप्रसाद श्रेष्ठ, अनिलकुमार सिन्हा, सपना प्रधान मल्ल र तेजबहादुर केसी छन् ।