दक्षिण कोरियामा अमेरिकाको सैन्य अड्डा र हतियार छ अनि चीन उसको सबभन्दा ठूलो व्यापार साझेदार हो । सुरक्षा र व्यापारबीचको यस द्वन्द्वले दक्षिण कोरियालाई तनाव दिएको छ । 

बेइजिङको प्रभुत्व र बाइडन प्रशासनको उत्तर कोरियाप्रतिको सम्भावित कठोर नीतिका कारण आफूलाई अप्ठ्यारो आइलाग्ने हो कि भनी दक्षिण कोरिया डराइरहेको छ ।

त्यसैले गर्दा दक्षिण कोरियाका राष्ट्रपति मून जे–इनले सोमवार बाइडन प्रशासनलाई उत्तर कोरियाका विषयमा डोनल्ड ट्रम्पले अपनाएको नीति नै अंगीकार गर्न आग्रह गरेका छन् । 

यसै वर्ष चीनका राष्ट्रपति सी चिनफिङले दक्षिण कोरियाको भ्रमण गर्ने अपेक्षा गरिएको छ । 
 

योन्सेई विश्वविद्यालयमा राजनीतिशास्त्रका प्राध्यापक मून चुङ–इनले चीनविरुद्ध अमेरिकी नेतृत्वको मोर्चामा दक्षिण कोरिया सामेल भएमा उसको जलक्षेत्रमा द्वन्द्वको स्थिति आउने बताएका छन् । 
 

सौलले दक्षिण चीन सागर र ताइवान जलसन्धिका विषयमा अपनाएको तटस्थताको नीति अन्त्य गर्न वाशिङटनले माग गर्ने उनले बताए । 

दक्षिण कोरियाको पश्चिमी किनारमा पीत समुद्रमा चीनले आक्रामक सैन्य गतिविधि गर्न सक्ने पनि उनको भनाइ छ ।

उनले थपे, ‘अमेरिका र चीनको सैन्य द्वन्द्वमा  कोरिया पर्न नहुने भन्ने अधिकांश कोरियालीहरूको मत छ ।’