प्रतिनिधि सभा विघटनविरुद्धको रिटमाथि सर्वोच्च अदालतको संवैधानिक इजलासमा भइरहेको बहस लामो जाने संकेत देखिएको छ । आइतवार डा. भीमार्जुन आचार्य, सुनील पोखरेल, दिनेश त्रिपाठी लगायत केही अधिवक्ताले बहस गरेका थिए । 

प्रधानन्यायाधीश चोलेन्द्र शमशेर जबरा नेतृत्वको इजलासमा भइरहेको सोमवारको सुनुवाइमा चिया ब्रेक अघिसम्म एकजना मात्र अधिवक्ताले बहस गरे ।

चिया ब्रेकअघि बहस गरेका अधिवक्ता दीनमणि पोखरेलले नै चिया ब्रेकपछि पनि बहसलाई निरन्तरता दिए । पोखरेलले २ घण्टाभन्दा लामो बहस गरेका छन् ।

रिट निवेदकमध्येका एक अधिवक्ताका अनुसार एउटै अधिवक्ताले घण्टौं बहस गरेमा प्रतिनिधिसभा विघटनविरुद्धका रिटमाथिको सुनुवाइ हप्तौं जाने सम्भावना छ ।

सर्वोच्च अदालत प्रशासनका अनुसार प्रतिनिधि सभा विघटनविरुद्ध परेका रिटमाथिको बहसका लागि १ सय ८८ जना कानून व्यवसायीले वकालतनामा लेखाएका छन् । 

प्रधानन्यायाधीश जबरा नेतृत्वको संवैधानिक इजलासले प्रतिनिधि सभा विघटनविरुद्ध परेका रिट संवैधानिक इजलासले नै हेर्ने आदेश गरेपछि आइतवारदेखि अन्तिम सुनुवाइ भइरहेको छ । 

मन्त्रिपरिषद्को सिफारिशमा राष्ट्रपति विद्या भण्डारीले पौष ५ गते प्रतिनिधिसभा विघटन गरी वैशाख १७ र २७ गतेका लागि निर्वाचन घोषणा गरेकी थिइन् ।