अमेरिकाका राष्ट्रपति–निर्वाचित जो बाइडनको शपथग्रहण समारोहमा सैनिकहरूबाटै आक्रमण हुन सक्ने आशंका रक्षा अधिकारीहरूले गरेका छन् ।

त्यसपछि फेडरल ब्यूरो अफ इन्भेस्टिगेसन (एफबीआई) ले उक्त समारोहमा सुरक्षा दिन आउने नेसनल गार्डका सबै २५ हजार सैनिकहरूको परीक्षण गरिरहेको छ । 

तेह्र दिनअघि अमेरिकी संसद् भवनमा ट्रम्प समर्थकहरूले हिंसा मच्चाएपछि वाशिङटनमा सुरक्षा चिन्ता बढेर गएको छ । 

अबका केही दिन डीसीको सुरक्षाका लागि खटिएका सैनिकहरूबाटै आगामी राष्ट्रपति तथा अन्य गण्यमान्य व्यक्तिलाई जोखिम हुने डर अधिकारीहरूलाई छ । 

गोप्य सुरक्षा क्लियरेन्स पाएका सेनाका एक जगेडा जवान समेत संसद् भवन आक्रमणमा संलग्न रहेको पाइएपछि पक्राउ परेका छन् । 
 

न्यु जर्सीका ३० वर्षीय टिमोथी हेल–कसानेली नामक ती सैनिक श्वेत सर्वोच्चतावादी हुन् र उनले अन्य हिंस्रक दंगाबाजहरूलाई भड्काएका थिए ।