ललितपुरको महालक्ष्मी नगरपालिका– ७ चाँगाथलीमा रहेको घरमा एक दम्पती मृत भेटिए ।

उनीहरूको मृत्युलाई लिएर नयाँ–नयाँ तथ्य बाहिरिने क्रम जारी छ ।

मृत भेटिएका सागर पोखरेलले उनीसँगै मृत भेटिएकी निर्मला पोखरेललाई कान्छी श्रीमतीको रूपमा भित्र्याएको तथ्य खुलेका छ । 

‘मृतक सागरले पहिलो श्रीमतीलाई डिभोर्स दिएर एक वर्षअगाडि कान्छी श्रीमतीको रूपमा भित्र्याएको खुलेको छ,’ महानगरीय प्रहरी परिसर ललितपुरका प्रमुख एसएसपी किरण बज्राचार्यले लोकान्तरसँग भनिन्, ‘अहिले परिवार शोकमा भएका कारण थप सोध्न मिलेको छैन ।’

३ जना दिदीहरूपछि जन्मिएका एक्ला छोरा सागरलाई परिवारले धेरै नै माया गरेर राखेको जस्तो देखिएको एसएसपी बज्राचार्यले बताइन् ।

सोमवार बिहान छोरीको घरमा गएका बुवाआमा फ्ल्याटमा फर्किँदा भित्रबाट चुकुल लगाएको अवस्थामा उनीहरूको शव भेटिएको थियो ।

त्यसलगत्तै बुवाआमाले १०० नम्बरमा फोन गरेर प्रहरीलाई जानकारी गराएपछि प्रहरी केही मिनेटमै पुगेको थियो । 

प्रहरी त्यहाँ पुग्दा दुवैजना विष सेवन गरेको अवस्थामा फ्ल्याटको भुइँमा मृत भेटिएको महानगरीय प्रहरी परिसर ललितपुरले जनाएको छ । 

शवनजिकै भाँडोमा बान्ता गरेको र सेल्फसको चक्की (विषादी) फेला परेको एसएसपी किरण बज्राचार्यले बताइन् । 

प्रहरीले विष सेवनको गरेको अवस्थामा भेटिएकाले उनीहरूले आत्महत्या गरेको हुनसक्ने प्रारम्भिक अनुमान गरेको छ ।

प्रहरीका अनुसार मृतक सागर पोखरेलका बुवा पूर्व सरकारी कर्मचारी हुन् । 

आर्थिक रूपमा सम्पन्न नै देखिएकाले आत्महत्याको कारण आर्थिक नभएर अरू नै हुनसक्ने प्रहरीको अनुमान छ ।

‘आर्थिक रूपमा सम्पन्न नै देखिएको छ । अहिले पोस्टमार्टमको रिपोर्ट कुरिराखेकाले अन्य कुरामा अनुसन्धानतर्फ लागेका छैनौं,’ एसएसपी बज्राचार्यले भनिन् ।