नेपाल कम्युनिस्ट पार्टी (नेकपा)का स्थायी कमिटी सदस्य योगेश भट्टराईले प्रधानमन्त्रीलाई स्वेच्छाचारी बन्न दिने कि लोकतान्त्रिक प्रधानमन्त्री भन्ने बहस नै आफूहरूको आन्दोलनको मूल मर्म भएको बताएका छन् । 

नेकपा समर्थित पत्रकारहरूको संगठन प्रेस संगठन नेपालको प्रचण्ड–नेपालपक्षीय भेलालाई मंगलवार काठमाडौंमा सम्बोधन गर्दै भट्टराईले बहसको विषय संविधान मान्ने कि नमान्ने भन्ने रहेको दाबी गरेका हुन् । 

उनले नेकपा समर्थित पत्रकारले रक्सी भट्टी रोज्ने कि दूध बेच्ने पसल रोज्ने भन्ने निर्णय लिनुपर्ने समय आएको बताए ।

‘साथीहरू यो आन्दोलन रक्सी उत्पादन गर्ने आन्दोलन होइन, भट्टी चलाउने आन्दोलन होइन, मान्छेको हितका लागि दूध उत्पादन गर्ने आन्दोलन हो । दूध बिक्री गर्न बिहानै जाडोमा उठ्नुपर्छ, घर–घर धाउनुपर्छ, रक्सी बेच्न घरघर जानु पर्दैन,’ भट्टराईले भने, ‘आज दुईवटा पसल खुलेका छन्, कता जाने ? रक्सीको पसलमा प्रचार गर्नुपर्दैन, राम्रो लेबलिङ गरिएको हुन्छ । दूध उत्पादन गर्नेको दुःख छ, गोबर फाल्नु पर्छ, घर–घरमा पुर्‍याउनुपर्‍यो, दूध बेच्नेको दुःख त्यस्तो हुन्छ । दूध बिक्री पसलमा जाने कि रक्सी ? यहाँ उपस्थित भट्टीतिर आकर्षित हुनुहुन्छ भन्ने लाग्दैन, गोठालो नै सही ।’

नेकपा निकट पत्रकार संगठन फुटेको छ । प्रधानमन्त्री केपी शर्मा ओलीपक्षीय समूहको भेला बिहीवार हुँदैछ ।