भारतको पश्चिम बंगालमा विधानसभा चुनाव आउँदै गर्दा राजनीति तातेको छ । 

राजनीतिक दलहरूबीच वाग्युद्ध जारी छ । पुरुलियामा एक भेलालाई सम्बोधन गर्दै राज्यकी मुख्यमन्त्री ममता बनर्जीले भारतीय जनता पार्टी नक्सली माओवादीभन्दा खतरनाक रहेको बताइन् । 
 

भाजपामा जान चाहनेहरू गए पनि आफूहरूले भाजपासामु शिर नझुकाउने उनको भनाइ छ ।

भाजपा र सीपीएमले आफूहरूको बैठकमा मान्छे पठाएर उपद्रो मच्चाइरहेका आरोप पनि ममताले लगाइन् । आफूहरूले पनि ती दलको बैठकमा मान्छे पठाएर उपद्रो मच्चाउने उनको भनाइ छ । 
 

भाजपाले चुनावअघि झूटो वाचा गर्ने गरेको अनि चुनाव जितेपछि लुक्ने गरेको पनि उनले बताइन् । 

भाजपा पश्चिम बंगालको निर्वाचन क्षेत्रमा कम, मिडियामा बढी देखिने गरेको पनि उनले बताइन् । विपक्षीलाई धम्क्याउन र तर्साउनका लागि भाजपाले मिडिया उपयोग गर्ने गरेको आरोप पनि उनले लगाइन् ।