रुकुम पश्चिमको आठबीसकोट नगरपालिका– ९ नयाँ बजारमा २ पक्षबीच विवाद हुँदा प्रहरीले १७ राउण्ड हवाइ फायर गरेको छ । 

रुकुम पश्चिम जिल्ला प्रहरी कार्यलयका प्रमुख प्रहरी नायब उपरीक्षक (डीएपी) रुपक श्रेष्ठका अनुसार गाउँपालिकाका नेपाली कांग्रेस र प्रचण्ड–माधव नेपाल समूहको (नेकपा) बीच विवाद चर्किएपछि स्थितिलाई नियन्त्रणमा लिन अश्रु ग्याससहित १७ राउण्ड हवाइ फायर गरिएको हो ।

पुरानो विवाद मिलाउनका लागि हिजो (सोमवार) प्रहरीले दुवै पक्षलाई बोलाएको थियो तर प्रयास असफल भएपछि पुनः आज विवाद मिलाउन बोलाइएको थियो । तर आज नेकपा पक्षका व्यक्तिले वडा नम्बर ९ का वडाध्यक्षलाई नै आक्रमण गरेपछि दुई पक्षबीच झडपको स्थिति बनेको डीएसपी श्रेष्ठले बताए । 

‘वडाध्यक्षलाई नै आक्रमण गरेपछि कांग्रेस पक्षले गाउँ नै उठाएर आक्रमण गरेको थियो,’ डीएसपी श्रेष्ठले भने, ‘त्यसलाई हामीले अहिले नियन्त्रणमा लिएका छौं ।’

नेपाली कांग्रेस पक्षले आफूलाई हिजोदेखि नै नेकपाले हेप्दै आएको भन्दै विरोध गरेका थिए भने नेकपा पक्षले केही नबोलेको डीएसपी श्रेष्ठले बताए ।