अमेरिकाका राष्ट्रपति जो बाइडनले केही वर्षअघि मात्र सैन्य सेवाबाट रिटायर भएका जनरल लोयड अस्टिनलाई रक्षामन्त्री बनाउने भएका छन् । 

माथिल्लो सदन सिनेटले उनको नामलाई स्वीकृति दिन बुधवार उनको सुनुवाइ गरेको छ । 

सुनुवाइका क्रममा अस्टिनले आफू रक्षामन्त्री बनेमा कोरोनाभाइरस महामारीविरुद्ध सबै सैन्य स्रोत उपयोग गर्ने बताए । 

‘देशको सबभन्दा ठूलो चुनौती भनेको महामारी हो,’ अस्टिनले सिनेट आर्म्ड सर्भिसेस कमिटीका सदस्यहरूलाई बताए । उनी सैन्य पोशाक लगाएर केही वर्षअघि सिनेटमा बयान दिन पुगेका थिए भने हिजो सुट टाइ लगाएर सुनुवाइमा पुगे । 

अमेरिकाले अपरेसन वार्प स्पीड नाम दिएर कोरोनाभाइरसविरुद्धका खोपहरू वितरण गर्ने योजना बनाएको छ । रक्षा मन्त्रालय पेन्टागनले खोप वितरणलाई तीव्रता दिन के कदम चाल्ने भन्ने विषयमा अस्टिनले स्पष्ट पारेनन् । 

त्यसबाहेक देशका सैनिकहरूमै पनि शत्रुहरू रहेको हुन सक्ने स्थितिका बारेमा उनले चर्चा गरे । उनले भने, ‘रक्षा मन्त्रालयको काम अमेरिकीहरूलाई शत्रुहरूबाट सुरक्षित राख्ने हो तर हाम्रै दर्जामा पनि केही शत्रुहरू रहेका हुन सक्छन्,’ उनले भने । 

‘अमेरिकी सेनामा यस्तो अतिवादको कुनै स्थान छैन,’ अस्टिनले थपे । यो बृहत्तर लडाइँको एक हिस्सा भएको उनको कथन छ । 
 

अस्टिनले देशका सैन्य साझेदारीहरूको महत्त्वलाई पनि जोड दिए । रक्षामन्त्री बनेमा आफ्नो पहिलो भ्रमणमा जापान, दक्षिण कोरिया र अस्ट्रेलिया जाने उनले बताए । हिन्द–प्रशान्त क्षेत्रका ती महत्त्वपूर्ण मुलुक हुन् र त्यस क्षेत्रमा चीनसँगको प्रतिस्पर्धा चर्को छ । 
‘

हामीले सामना गरेको सबभन्दा चिन्ताजनक प्रतिस्पर्धी चीन हो,’ उनले बताए । 

‘उनीहरू विश्वमा प्रभुत्व कायम गर्न चाहन्छन्,’ अस्टिनले थपे । ‘उनीहरूको आक्रामकतालाई सन्तुलनमा राख्न हाम्रो जोड रहनेछ ।’

उनले चिनियाँ सेनासँग प्रतिस्पर्धा गर्दै उसभन्दा माथि रहने गरी अमेरिकी सेनालाई बलियो बनाउन जोड दिने बताए । यसका लागि नयाँ प्रविधिमा लगानी गर्नुपर्ने उनको भनाइ छ । विशेषगरी कृत्रिम बौद्धिकता र क्वान्टम कम्प्युटिङको क्षेत्रमा चीनले अमेरिकासँगको अन्तर घटाउँदै लगेको छ । 

रुस पनि अमेरिकाको मुख्य प्रतिस्पर्धी रहेको तर चीनको जस्तो उसको चिन्ता गर्नु नपर्ने अस्टिनको भनाइ छ । 

इरानको सन्दर्भमा कुरा गर्दै अस्टिनले आणविक सम्झौतामा अमेरिकालाई पुनः प्रवेश गराउन तेहरानको कदममा निर्भर रहने बताए । 

सिनेटले अस्टिनलाई स्वीकृति दिएमा रक्षामन्त्री बन्ने काला जातिका पहिलो व्यक्ति हुनेछन् ।