अमेजन प्राइम भिडियोले बनाएको वेब सिरीज ताण्डवको विरोध प्रकरणलाई लिएर शिवसेनाले भारतीय जनता पार्टीमाथि गम्भीर आरोप लगाएको छ । 
 

भाजपाले अनेकौं ताण्डव गरिरहेको भनी शिवसेनाको आधिकारिक पत्रिका सामनामा शिवसेनाले लेख्यो । 
 

अर्णव गोस्वामीको च्याट लीक भएको विषयलाई सन्दर्भ बनाउँदै शिवसेनाले लोकसभा निर्वाचन जित्न ४० जवानको रगत बगाइएको भनी भाजपामाथि आरोप लगाएको छ ।

यस्तै किसिमका आरोप यसअघि पनि लगाइएको थियो र अर्णवको ह्वाट्सयाप च्याट बाहिर आएपछि यी आरोप थप पुष्टि भएको शिवसेनाले बताएको छ । यति ठूलो काण्ड हुँदा पनि भाजपाले ताण्डव त परै जाओस्, भाँगडा पनि नगरेको र भगवान् राम पनि टाउको ठोकिरहनुभएको होला भनी शिवसेनाले लेखेको छ । 

राष्ट्रिय सुरक्षासँग सम्बन्धित गोप्य कुरा गोस्वामीले सार्वजनिक गरिदिँदा भाजपाले किन ताण्डव नगरेको भनी शिवसेनाले प्रश्न सोधेको छ । ‘चीन लद्दाखमा प्रवेश गरेर हिन्दुस्तानी भूमि कब्जा गर्दा भाजपा किन ताण्डव गर्दैन ? गोस्वामीले ४० जना जवानको हत्यामा आनन्द व्यक्त गर्दा देश, देव र धर्मको अपमान भएको छ,’ शिवसेनाले लेखेको छ । 

भाजपा अब हास्यव्यंग्यको विषय बनेको उसले लेखेको छ । दिनदिनै नयाँ स्वाङ र ढोङ रचेर जनतालाई मनोरञ्जन गर्ने प्रयोग भाजपाले गरिरहेको शिवसेनाको आक्षेप छ । 
 

अर्णव गोस्वामीको च्याट लीक भएको विषयमा विपक्षी दलहरूले राष्ट्रिय सुरक्षाको विषय उठाउँदै सरकारसँग जवाफदेहिताको माग गरेका छन् ।