तारादेवी सम्मानबाट ३ स्रष्टा सम्मानित

तारादेवी स्मृति फाउन्डेसनले १५ औं स्मृति दिवसका अवसरमा ३ जना स्रष्टालाई सम्मान गरेको छ ।

शुक्रवार महाराजगञ्जमा आयोजना गरिएको कार्यक्रममा महानगरका मेयर विद्यासुन्दर शाक्यले सम्मान प्रदान गरेका हुन् ।


Advertisement

सम्मानित हुुनेमा गीतकार स्व. भैरवनाथ रिमाल ‘कदम’, संगीतकार स्व. गणेश परियार र गायिका ज्ञानु राणा छन् । 

गीतकार रिमालको गएको पुस २५ गते र संगीतकार परियारको माघ ४ गते निधन भएको हो । उनीहरुको निधन हुनु अघि नै फाउन्डेसनले सम्मान गर्ने निर्णय गरिसकेको थियो । 


Advertisement

स्व. रिमालको सम्मान उनकी छोरी रेखा ढकालले र स्व. परियारको सम्मान उनकी नातिनी मरिया परियारले ग्रहण गरेकी थिइन् । 

उनीहरुलाई मेयर शाक्य, राज्यमन्त्री रामवीर मानन्धर, फाउन्डेसनका अध्यक्ष दीपक के. सी., नातिकाजी स्मृति समाजका अध्यक्ष शम्भुजीत बास्कोटाले संयुक्त रुपमा सम्मान गरेका थिए । 

फाउन्डेसनकी उपाध्यक्ष वरिष्ठ अभिनेत्री भुवन चन्द थापा पनि त्यस क्रममा सहभागी थिइन् । 

सम्मानितहरुलाई जनही २५ हजार १ रुपैयाँ प्रदान गरिएको थियो भने दोसल्ला ओडाएर ताम्र पत्र प्रदान गरिएको थियो ।     

त्यस अवसरमा शहरी विकास राज्य मन्त्री रामवीर मानन्धरले नियमित करीब ४ घण्टा २० मिनेट बढी लगातार गीत गाएर गिनिज बुक अफ वल्र्ड रेकर्डसमा नाम लेखाएकोमा विशेष सम्मान प्रदान गरेको थियो । 
यसै गरी स्थानीय सेवामा उल्लेख्य काम गरेकोमा वडाध्यक्ष दीपक के. सी. लाई सम्मानित गरिएको थियो । 

काठमाडौं महानगरपालिकासँगको सहकार्यमा सम्पन्न कार्यक्रम राष्ट्रिय सभा गृहमा आयोजना गर्ने तयारी थियो । राजनीतिक कार्यक्रमले भृकुटीमण्डप क्षेत्रमा आवातजावत असामान्य बनेपछि वडा ३ कार्यालय भवनको प्राङ्गणमा कार्यक्रम सम्पन्न गरिएको थियो । 

कार्यक्रममा मेयर शाक्यले,  महानगरले नयाँ कलाकारलाई मञ्च र पुराना कलाकारलाई सम्मान गरेर कला जोगाउने प्रयास गरेको बताए । ‘यो हामीले दायित्वभित्रको काम गरेका हौं,’ उनले भने, ‘काठमाडौंमा जातीय समुदायले धानेका परम्परागत बाजागाजाको संरक्षण, सम्बर्धन र प्रवर्धनका लागि हामीले गुरुहरुलाई जनही ३० हजार नगदसहित सम्मान गरेका छौं । यो रकम ठूलो होइन तर सरकारको सहभागिता भने ठूलो हो । यो निरन्तर चलिरहनेछ ।’ 
कला बचाउन स्रष्टा बचाउनु पर्ने तथ्य आफूलाई महसुस भएको बताउँदै मेयर शाक्यले, महानगरको लगानी हुने ठाउँमा विवाद हुनु नहुने बताए । ‘सबै कलाकार एउटै आवाज र एउटै मञ्चमा हुने हो भने तपाईँहरुका लागि हामी लगानी गर्छौं । तर, त्यहाँ पक्ष विपक्ष हुनुहुँदैन,’ शाक्यको भनाइ थियो ।  

काठमाडौं महानगरले तारादेवी फाउन्डेसनमा २० लाख रुपैयाँको अक्षय कोष स्थापना गरिदिएको छ । 

नारायण गोपालको अधुरो चाहना पूरा गराउन करीब ६ करोड रुपैयाँ लगानीमा ‘‘गीत गंगा अडिटोरियम’’ निर्माण गर्दैछ । 

कार्यक्रममा फाउन्डेसनका महासचिव सोमन सैँजुले महानगरको अभिभावकीय नेतृत्वबाट न्यानो महसुस भएको बताए । 

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्