अमेरिकाकी उपराष्ट्रपति कमला ह्यारिसका पति डग्लस एमहोफले आफूहरूबीच पहिलो नजरमै प्रेम बसेको बताएका छन् । 
 

एमहोफले जीक्यू पत्रिकामा एक आलेख प्रकाशन गर्दै पत्नी ह्यारिसप्रति आफूलाई गर्व लागेको र निर्वाचन अभियानमा उनीसँग हिँड्दा राजनीतिको नयाँ ज्ञान पाएको बताए । 
‘

म कमलालाई भेट्नेबित्तिकै प्रेममा परें । उनी न्यानो, रमाइलो र करुणा भएकी व्यक्ति हुन् । अनि आफूले विश्वास गरेको विषयमा उनी दत्तचित्त भएर लाग्छिन्,’ उनले लेखे । 
 

एमहोफले ह्यारिसलाई सन् २०१३ मा भेटेका हुन् । त्यतिखेर उनी क्यालिफोर्निया राज्यकी महान्यायाधिवक्ता थिइन् भने एमहोफ लस एन्जिलिसमा मनोरञ्जन जगतका प्रख्यात वकिल थिए । 

उनीहरूले सन् २०१४ मा विवाह गरेका हुन् । एमहोफले अघिल्लो विवाहबाट जन्माएका दुई सन्तान कोल र एल्लालाई उनीहरूले नै हुर्काइरहेका छन् । 

अब उनीहरू ब्लेयर हाउसमा बस्नेछन् । यो ह्वाइट हाउसको सडकपारिको कूटनीतिक निवास हो । उपराष्ट्रपतिको परम्परागत निवास नेभल अब्जर्भेटरीमा छ । 
 

ह्यारिसलाई बाइडनले उपराष्ट्रपति बनाउने भएपछि एमहोफले वकालतबाट छुट्टी लिएर निर्वाचन अभियानमा सघाएका थिए ।