अमेरिकाका प्रख्यात वामपन्थी विचारक नोम चोम्स्कीले देशका उदारवादी बुद्धिजीवीहरू ट्रम्पका समर्थक जस्तै कल्पनाको दुनियाँमा रहेको र अन्तर्राष्ट्रिय आतंकवादलाई प्रोत्साहन गरिरहेको बताएका छन् । 
 

आरटीका क्रिस हेजेजलाई अन्तर्वार्ता दिँदै उनले बताए, ‘निर्वाचनमा हार भएको भनी रिपब्लिकन पार्टीका समर्थकलाई स्वीकार गर्न गाह्रो परेजस्तै उदारवादी अमेरिकी बुद्धिजीवीहरू अमेरिका विश्वकै अग्रणी आतंकवादी मुलुक हो भनी स्वीकार गर्न सक्दैनन् ।’

सार्वभौमसत्ता सम्पन्न मुलुक बनेको सम्पूर्ण इतिहासमा अमेरिकाले कसै न कसैका विरुद्ध आक्रामक युद्ध गरेको चोम्स्कीले बताए । रोनल्ड रेगनले आफ्नो परराष्ट्रनीतिमा जोड दिएको आतंकवादविरुद्धको युद्ध खासमा मध्य अमेरिका र दक्षिण अफ्रिकामा अमेरिकी आतंकवादविरुद्धको प्रतिकारलाई गर्न खोजेको व्यवस्थापन हो । 

नेल्सन मन्डेलालाई अमेरिकाले सन् २००८ सम्म पनि आतंकवादी मानिरहेको थियो जबकि विभेदकारी गोराहरूको सत्ता पहिल्यै ढलिसकेको थियो । अमेरिकाले निकारागुआमा चलाएको छद्म युद्धलाई अन्तर्राष्ट्रिय न्याय अदालतले अन्तर्राष्ट्रिय कानूनको उल्लंघन भनेको थियो । 

अ​मेरिकाको अर्को शिकार क्युबा बनेको छ । क्युबाले दशकौंसम्म अमेरिकी नाकाबन्दी खेप्नुपरेको थियो र त्यहाँको सरकार ढलाउनका लागि अमेरिकाले निरन्तर कोशिश गरेको थियो । 

‘यो गम्भीर आतंकवादी युद्ध थियो जसले झण्डै संसारकै सर्वनाश गरिदियो,’ चोम्स्कीले क्युबन मिलाइल क्राइसिसलाई सन्दर्भ बनाउँदै भने । 

उदारवादी बुद्धिजीवीहरूले अमेरिकी नीतिहरूको वास्तविकतालाई बुझ्ने कोशिश नगरेको चोम्स्की बताउँछन् । जनवरी ६ मा संसद् भवनमा गरिएको आक्रमण ट्रम्प समर्थकहरूको बौलाहा भीड थिएन । तिनीहरूलाई परास्त गरेर अमेरिकी लोकतन्त्रको गौरवलाई प्रमाणित गरेको भन्ने संकथन फैलाइयो ।