सुर्खेतमा हराएको मोटरसाइकल अर्कै नम्बर प्लेटमा कलंकीमा भेटिएपछि...

दैलेखको नारायण नगरपालिका– ९ का दिनेश थापा गत मंसिर १३ गते कोहलपुरबाट सुर्खेत हुँदै दैलेख जाँदै थिए । 

आफ्नै नगरपालिकामा पोल्ट्रीफार्म सञ्चालन गर्दै आएका थापा कुखुरालाई आवश्यक पर्ने दाना किन्नका लागि नेपालगञ्ज गएर फर्किएका थिए ।

---

Advertisement

---

सुर्खेतमा खाजा खान मोटरसाइकल पार्किङमा राखेर नजिकैको खाजा पसलमा छिरे । तर फर्किँदा राखेको ठाउँमा मोटरसाइकल थिएन । 

कसैले अर्कै ठाउँमा लगेर राखिदिएको छ कि भनेर यताउता खोजे, तर भेटिएन ।

---

Advertisement

---

भेटियोस् पनि कसरी ? मोटरसाइकल चोरी भैसकेको रहेछ । त्यसपछि उनले जिल्ला प्रहरी कार्यालय सुर्खेतमा उजुरी दिए । 

निकै मन परेको पल्सर २२० मोटरसाइकल दुःख गरेर किनेका थिए ।

उनी निराश भएर सार्वजनिक बस चढी दैलेख फर्किए ।

उनले मोटरसाइकल भेटिने आशा मारिसकेका थिए । तर ३ दिनअघि फोनमा शुभ समाचार सुने ।

‘आशा मारेको थिएँ ।  अर्को मोटरसाइकल किन्नका लागि पैसा जम्मा गर्दै थिएँ,’ थापाले लोकान्तरसँग भने, ‘३ दिनअगाडि महानगरीय ट्राफिक प्रहरी महाशाखा बग्गीखानाबाट तपाईंको मोटरसाइकल हामीले भेट्टाएका छौं, लिन आउनुस् भनेर फोन आयो । मेरो मोटरसाइकल काठमाडौंमा भेटिएको छ भन्दा एकचोटी त पत्यार नै लागेन ।’

त्यसपछि उनी मोटरसाइकल लिन दैलेखबाट काठमाडौं आए ।  

***

यता ट्राफिक प्रहरीले माघ ३ गते बेलुका कलंकीमा सवारी साधनहरूको बिलबूक तथा लाइसेन्स चेकजाँच गरिरहेको थियो । 

त्यही क्रममा लु ४५ प ४३२७ (नक्कली नम्बर प्लेट)को २२० सीसी पल्सर मोटरसाइकलमा एक जना आए ।

ट्राफिक प्रहरीले लाइसेन्स र बिलबूक माग्यो, तर ती व्यक्तिले आफू कलंकी नजिकै बस्ने भएकाले बिलबूक र लाइसेन्स लिएर आउँछु भनेर मोटरसाइकल त्यहीँ छाडेर गए । तर, कहाँ आउनु ?

२ दिनसम्म कोही नआएपछि प्रहरीलाई शंका लाग्यो ।

त्यसपछि प्रहरीले उक्त मोटरसाइकलको विवरण खोजी गर्‍यो । खोजीका क्रममा पत्ता लाग्यो उक्त मोटरसाइकलको वास्तविक नम्बर भे १० प १०३९ रहेछ । उक्त मोटरसाइकल हराएको भनी सुर्खेतमा उजुरी पनि परेको रहेछ ।
त्यसपछि हो प्रहरीले दिनेशलाई फोन गरेको ।

चोर त उम्कियो, तर मोटरसाइकल काठमाडौं ल्याउन नपाउँदै प्रहरीको हात लाग्यो ।

***

महाशाखामा पुस महिनामा मात्रै ६० वटा मोटरसाइकल हराएको उजुरी परेको थियो, त्यसमध्ये २९ वटा मोटरसाइकल फेला परेको छ ।

फेला परेकामध्ये २४ वटा मोटरसाइकल सोमवार वास्तविक धनीलाई बोलाएर जिम्मा लगाइएको छ ।

मोटरसाइकल भरपर्दो पार्किङमा नराख्ने तथा पर्याप्त सुरक्षा सावधानी नअपनाउने गर्दा चोरी हुने गरेको महाशाखाका प्रमुख एसएसपी जनक भट्टराईले बताए ।

‘तपाईंहरूले लाखौं खर्चेर किनेको सवारी साधनमा सानो लक राख्दा चोरी हुनबाट जोगिन सक्छ,’ एसएसपी भट्टराईले भने ।

महाशाखाले पीडित सहायता इकाइबाट सादा पोशाकमा खटाएको विशेष अप्रेशन टोलीले उपत्यकाका विभिन्न स्थानबाट मोटरसाइकलहरू बरामद गरेको हो ।

पुस महिनामा ५ जना चोरलाई पक्राउ गरेर कानूनको दायरामा ल्याइएको महाशाखाले जनाएको छ ।