प्याजका बेर्ना बेचेर महिनामै लाखौं आम्दानी गर्दै महिला

व्यावसायिकरूपमा कुनै पनि काममा लागे सफलता पाउन सकिन्छ भन्ने उदाहरण कैलालीका कृषि कर्ममा लागेका महिलाले पुष्टि गरेका छन् ।

कैलालीका किसान महिलाले यतिखेर तरकारी प्याजका बेर्ना बेचेर राम्रो आम्दानी लिन थालेका छन् ।


Advertisement

छोटो समयमा राम्रो आम्दानी हुने कृषि पेशाअन्तर्गत तरकारीको बेर्ना उत्पादन पनि हो । तरकारीका बेर्ना उत्पादनमा भविष्य देखेपछि यसमा किसानको आकर्षण बढ्दै गएको छ ।

कैलालीको टीकापुर–१ वनगाउँ ज्ञानीटोलमा कृष्णामती चौधरीको आरती बेर्ना नर्सरी उत्पादन फार्म छ । यहाँ ४ कठ्ठा क्षेत्रफलमा प्याजको बेर्ना उत्पादन गरी सोही स्थानबाट बिक्री गरिन्छ । कृष्णामतीलाई आजभोलि प्याजको बेर्ना बेच्न भ्याइँनभ्याइँ छ ।


Advertisement

उनले अन्य तरकारीको बेर्नासँगै प्याजको बेर्ना बेचिरहेकी छन् ।

व्यावसायिकरूपमा बेर्ना उत्पादन गर्ने उनले अहिले दैनिक नर्सरीबाटै २५० रुपैयाँ प्रतिकिलोमा बेर्ना बेचिरहेकी छन् । वनगाउँ र घियागाउँका २ स्थानमा गरी ७ कठ्ठा क्षेत्रफलमा प्याजको बेर्ना उत्पादन गरिरहेकी छन् ।

हालसम्म करीब ३० क्विन्टल प्याजको बेर्ना बेचिसकेकी छन् । कृष्णामतीले यो सिजनमा ७ लाख ५० हजार रुपैयाँका बेर्ना बिक्री गरेकी हुन् । ‘अन्य वर्षभन्दा यस वर्ष प्याजको बेर्नाको बिक्री राम्रो भइरहेको छ । यस वर्ष आम्दानी पनि राम्रै भइरहेको छ,’ उनले भनिन्, ‘बेर्ना बिक्री गर्ने सिजनमा महिनामा ३ लाख रुपैयाँसम्म कमाउन सकिन्छ ।’

तरकारी खेतीभन्दा बेर्ना बिक्रीमा आम्दानी देखेपछि उनले बेर्ना उत्पादन रोजेकी हुन् ।

कृष्णामतीजस्तै अर्की महिला सुभद्रा चौधरीले पनि यतिखेर प्याजका बेर्ना बेचेर राम्रो कमाइ गरिरहेकी छन् । उनले ५ कठ्ठा जग्गामा बेर्ना उत्पादन गरेकी छन् । ‘आजभोलि प्याजको बेर्ना बेचिरहेकी छु, यसअघि गोलभेंडा, काउली, बन्दागोभीको बेर्ना बेचें,’ उनले भनिन्, ‘मासिक १ लाख रुपैयाँसम्म कमाइ हुन्छ, काम हामी आफ्नै परिवारका सदस्यले गर्छौं ।’

उनको बारीमै बेर्ना किन्ने ग्राहक पुग्छन् । थोरै जमिनमा तरकारी खेती गर्नेले बेर्ना किनेर लगाउँछन् । थोरै बारीमा खेती गर्नेका लागि बेर्ना किनेर लगाउन सजिलो हुन्छ । कृष्णामतीको बारीमा प्याजको बेर्ना किन्न गएकी बन्दना जैशीले गाउँमै बेर्ना पाएपछि सजिलो भएको बताइन् । ‘१ किलो प्याजको बेर्ना चाहिएको थियो, सहजै पाइयो,’ उनले भनिन्, ‘एक किलो लगाउनेले बेर्ना आफैं राख्न झण्झट हुन्छ । यसरी किन्न पाए सजिलो भयो ।’

विगतका वर्षमा सहज र सस्तोरूपमा सीमा नाकाबाट प्याजको बीउ नेपाली बजारमा आउने गर्दथ्यो तर यस वर्ष सीमा नाकाबाट तरकारी बेर्ना आउन पाएका छैनन् । यसले नेपाली उत्पादकले बजार पाएको किसान बताउँछन् । ‘अन्य बेर्ना उत्पादनमा लगानी र मेहनत धेरै लाग्छ तर प्याजको बेर्ना उत्पादनमा कम मेहनत लाग्ने गर्दछ,’ होसन्ना बेर्ना नर्सरीका सञ्चालक जयराम चौधरी भन्छन्, ‘सहज भएकाले प्याजका बेर्ना उत्पादन गरी बिक्री गरिहेका छौं । हाम्रो पनि परिवारका सदस्यले काम गर्छन् । घरमै बसीबसी आम्दानी लिन सकिन्छ ।’

टीकापुर नगरपालिका कृषि शाखाले पनि बीउ उत्पादनमा लागेका किसानलाई प्रोत्साहन गर्ने नीति लिएको छ । 

कमेन्ट गर्नुहोस्