गण्डकी प्रदेश सांसद बिन्दु कुमार थापाले नेपाल कम्युनिष्ट पार्टी (नेकपा) को आधिकारिक फुटपछि मात्रै काँग्रेसले गण्डकी प्रदेश सरकार पुनर्गठनका लागि धारणा बनाउने बताएका छन् । 

नेपाल प्रेस युनियन कास्कीले पोखरामा बुधबार आयोजना गरेको पत्रकार सम्मेलनमा बोल्दै उनले सो कुरा बताएका हुन् ।

‘सरकार बन्न नसक्ने अवस्था भए काँग्रेसले सरकार बनाउँछ, अन्यथा अहिलेकै अवस्थामा अविश्वासको प्रस्ताव ल्याउने पक्षमा काँग्रेस छैन,’ उनले भने ।  

समृद्धिको नारा दिएको नेकपा सरकारले भाषणबाहेक जनतालाई केही नदिएको र ५ वर्षका लागि म्यान्डेट असफल भएको उनको टिप्पणी छ । 

उनले भने, ‘जनताका लागि गरिएको भनिएको राजनीतिले पटक–पटक जनतालाई दुख दिएको छ । आज पनि व्यक्तिगत लहडको राजनीतिले जनमतमाथि जुन अपमान भैरहेको छ । यो सयौं वर्षसम्मका लागि क्षम्य हुने छैन । आन्तरिक अन्तर संघर्षलाई देशको प्रतिष्ठासँग साट्ने प्रधानमन्त्री केपी शर्मा ओलीको कदमको जति विरोध गरे पनि कम हुने छैन ।’

उनले विघटित संसद कुनै पनि हालतमा पुनस्र्थापना हुनुपर्नेमा पनि जोड दिए ।​