चलचित्र ‘एउटा यस्तो प्रेम कहानी’ प्रदर्शन भयो, अघिल्लो बिहिबार । यो चलचित्रबाट स्टार कलाकार करिश्मा मानन्धरकी छोरी कविता मानन्धरले डेब्यू गरेकी थिइन् ।

लामो समयदेखि चलचित्र उद्योगमा सक्रिय करिश्माकी छोरीको डेब्यु प्रोजेक्ट भएकाले उक्त चलचित्रप्रति दर्शकको व्यापक चासो थियो, यो हुनु स्वभाविकै पनि थियो । तर, निर्माता तथा प्रोड्युसर शिव श्रेष्ठले चलचित्रलाई निकै फितलो तरिकाले तयार पारे । केहि कलाकारको डबिङ पुरा नहुँदै, कतिपय कलाकारको बाँकी रहेको दृश्यको छायांकन पुरा नगरेर उनले चलचित्र प्रदर्शन गरिदिए । त्यसपछि स्वयं उक्त चलचित्रका कलाकारहरु अचम्मित बने ।

शिवले किन यो जोखिम मोलेर चलचित्र प्रदर्शनमा ल्याए त्यो अहिलेसम्म रहस्य बाहिर आएको छैन । किन यति हतार गरेर चलचित्र प्रदर्शनमा ल्याए ? त्यो पनि अहिलेसम्म कुनै रहस्य बाहिर आउन सकेको छैन ।

यो चलचित्रलाई पत्रकार, समीक्षक न त दर्शकले नै मन पराए । कतिसम्म भने निर्माण टिमले टिकट किनेर आयोजना गराइएको प्रिमियरमा उपस्थित अतिथीहरुले समेत चलचित्रलाई कुनै राम्रो प्रतिक्रिया दिएनन् ।

कोभिड–१९ पछि पहिलोपटक नयाँ चलचित्र प्रदर्शन भएकाले धेरैको चासो थियो, यो चलचित्रप्रति । तर, प्रदर्शन भएको दोस्रो दिनमै चलचित्र हलबाट उत्रियो । यसले सबैभन्दा धेरै घाटा त स्वयं शिवको टिमलाई भएको छ ।
चलचित्र निर्माणमा खर्च भएको डेढ करोड हाराहारी बालुवामा पानी सरह भयो ।
तर, यो चलचित्रलाई शिवले हावा तालमा जसरी प्रदर्शन गरे यसले कसैलाई बेफाइदा भएको छ भने त्यो करिश्मा मानन्धरकी छोरी कविता मानन्धरका लागि पनि हो । करिश्माको बिडो थाम्नका लागि कविता तयार भएर उद्योगमा प्रवेश गर्दै थिइन् ।

अरु चलेका कलाकार थिए, एउटा चलचित्र घाटामा जाँदैमा उनीहरुका लागि खासै फरक पर्ने वाला थिएन ।

तर, लामो समयदेखि राम्रो प्रोजेक्ट हेरेर चलचित्र उद्योगमा प्रवेश गर्न खोजिरहेकी करिश्मा पुत्री कविताको लागि भने यो चलचित्र निल्नु न ओकल्नु जस्तै भएको छ । चलचित्र नराम्रोसँग फ्लप भयो । दर्शकले चलचित्र मन पराएनन् । कविताका धेरै दृश्य समेत छायांकन नहुँदै सम्पादन भयो र प्रदर्शन भयो । मैले पटक पटक राम्रोसँग तयारी गरेर मात्रै प्रदर्शन गर्नुपर्छ भनेकी थिएँ, करिश्माले लोकान्तरसँग भनिन्, ‘तर, शिव श्रेष्ठले कसैको कुरा सुन्नुभएन । किन यसरी हतारमा सबै काम नसकाएर प्रदर्शन गर्नुभयो । मैले कुरा बुझिन । छोरीले चलचित्र उद्योगमा लागेको सुरुवातमै मन दुखाएकी छ ।’

करिश्माले अब छोरीलाई अरु चलचित्र साइन गराउँदा निकै सोचेर गम्भिर भएर मात्रै काममा लगाउन सक्ने संकेत समेत दिएकी छिन् ।

आफ्नो छोरा शक्ती श्रेष्ठ समेतको करिअरलाई जोखिममा पारेर शिवले किन चलचित्र बनाए र किन रिलिज गरे, यो उनले नै जान्ने कुरा हो । तर, उनले जान्नुपर्ने कुरा के पनि थियो भने यति लामो समयदेखि यो उद्योगमा काम गरेको एउटा कलाकारले आवश्यक सम्पुर्ण दृश्य खिचेर, डविङका काम सबै सकाएर, कलाकारको पारिश्रमिक तिरेर मात्रै प्रदर्शन गर्नुपर्ने हुन्थ्यो ।

कतिसम्म भने शिवले धेरैजसो कलाकारको पारिश्रमिक समेत अहिलेसम्म दिएका छैनन् । करिश्माकी छोरी कविताले समेत १ लाख पारिश्रमिक अहिलेसम्म पाएकी छैनन् । पैसा अर्कै कुरा हो, करिश्मा थप्छिन्, ‘छोरीको चलचित्र यात्रामा निकै असर परेको छ । अमेरिकामा बसेर अध्ययनरत छोरीलाई नेपाल झिकाएर चलचित्रमा काम गराएको के अर्थ भयो ?’