महोत्तरीको बलवा नगरपालिका–११ रौजागाउँमा गोमन सर्पलाई नाग देवता भन्दै पूजा आराधना गर्न थालिएको छ ।

रौजाको एकै स्थानमा विगत १२ दिनदेखि गोमन सर्प देखिन थालेपछि त्यसलाई ‘नाग देवता’ भन्दै स्थानीयले पूजाआजा गर्दै आएका छन् ।

सो सर्पलाई स्थानीयले नाग देवता भन्दै पूजाआजा गर्न थालेको स्थानीय गुलाम साहले बताए ।

गाउँ नजिकैको वनछेऊ सतलाल राउतको खेतमा रहेको दुलोबाट सधैं दिउँसो १२ बजेपछि निस्कने र बेलुका ४ बजेतिर पुनः सोही दुलोभित्र पस्ने गरेको सो सर्पलाई वरपर छिमेकी गाउँबाट पनि हजारौं मानिस हेर्न र पूजाआजा गर्नका लागि आउने गरेको स्थानीय जीतेन्द्र मण्डलले बताए ।

सो सर्प निस्कनेबित्तिकै चारैतिरबाट हेर्नेहरुले घेरिदिने र नजिकमा जाँदा पनि कसैलाई केही नगर्ने गरेको कारण सबैले त्यसलाई नाग देवता भन्दै पूजाआजा गर्न थालेको स्थानीय वीरेन्द्र यादवले बताए । सो सर्पलाई स्थानीयले कचौरामा दूध खान दिने गरेका छन् भने पूजाआजा गर्नेहरूले फूल, तुलसी, बेलपत्र लगायतका वस्तु र फलफूल पनि चढाउने गरेको स्थानीय बताउँछन् ।

शुरूशुरूमा वनमा घाँस काट्न गएका महिलाको एक समूहले सो सर्पलाई देखेका थिए भने उनीहरू डराएर भागेका थिए । तर पछि सर्प केही नगरेको र नभागेपछि महिलाले गाउँलेलाई सो कुरा सुनाएका थिए ।

त्यसै दिनदेखि बिहीवार १२ औं दिनसम्म दैनिकरूपमा सो सर्प निस्कने गरेको र स्थानीयसहित छिमेकी गाउँका समेत व्यक्तिहरू पूजाआजा गर्न घुइँचो लाग्ने गरेको छ ।