चलचित्र ‘सत्यम’बारे चर्चा भइरहेको छ । यस चलचित्रमा अभिनेता महानायक हुने चर्चा चल्दै आएको थियो । धेरैजसो मिडियाले राजेश हमालसँग ‘सत्यम’ निर्देशकले साइन गरिसकेको दाबी गर्दै आएका थिए ।

तर, राजेश हमालले यो चलचित्रबारे अहिलेसम्म केहि बोलेका थिएनन् । तर, धेरै समयपछि हमालले पहिलोपटक यसबारे मुख खोलेका हुन् । सामाजिक संजाल फेसबुकमा चलचित्रको स्क्रिप्ट सम्पादनको काम भइरहेको तस्विर राख्दै भनेका छन्, ‘चलचित्रको काम हुँदैछ ।

अहिले स्क्रिप्टमा समिक्षा हुँदै ।’ यसअघि हमालले यो चलचित्रबारे कुनै धारणा राखेका थिएनन् । यो तस्विर सार्वजनिक भएसँगै हमाल लामो समयपछि चलचित्र ‘सत्यम’बाट चलचित्र उद्योगमा फर्किने पक्का भएको छ ।

हमालसँगै यो चलचित्रमा अनुपविक्रम शाही र पल शाहको पनि अभिनय रहनेछ । शंकर कार्कीको निर्देशनमा बन्ने चलचित्रलाई रेसम सापकोटाले लगानी गर्नेछन् । यो चलचित्रको स्क्रिप्ट सकिएपछि चलचित्रको छायाँकनको काम थालनी हुने बुझिएको छ । स्रोतका अनुसार चलचित्र आगामी बैशाखमा छायांकन सुरु गरिनेछ ।

हमालले बागमती र सकुन्तलापछि कुनैपनि चलचित्र खेलेका थिएनन् । उनलाई दर्जनौं चलचित्रको अफर गएको थियो ।