व्यवसायीका समस्या समाधानका लागि ‘भिजन पेपर’ ल्याउँदै वाणिज्य महासंघ

नेपाल उद्योग वाणिज्य महासंघका अध्यक्ष शेखर गोल्छाले उद्योगी व्यवसायीको समस्या समाधानको लागि महासंघले ‘भिजन पेपर’ तयारी गरेको बताएका छन् ।

मुलुकको अर्थतन्त्रको सूचकांक जीडीपीलाई १० प्रतिशतभन्दा माथि पुर्‍याउन र रोजगारी अभिवृद्धि कसरी गर्न सकिन्छ भनेर विकसित मुलुकको अनुभवलाई समेत समेटेर भिजन पेपर तयार गरिएको उनले जानकारी गराए । 


Advertisement

बुटवल उद्योग वाणिज्य संघ रुपन्देहीको सोमवार बुटवलमा भएको ६७ औं वार्षिक साधारणसभा तथा २४ औं अधिवेशनको उद्घाटन समारोहलाई सम्बोधन गर्दै अध्यक्ष गोल्छाले भिजन पेपरमा निजी क्षेत्रको एकरूपताको लागि सीएनआई लगायतका अरु संस्थासँग समेत छलफल भइरहेको जानकारी गराए ।

आफ्नो नेतृत्वको नेपाल उद्योग वाणिज्य महासंघमा निजी क्षेत्रको समस्या भोगेको र बुझेको टीम रहेकाले समस्या समाधान कसरी गर्न सकिन्छ र लगानी कसरी अभिवृद्धि गर्न सकिन्छ भनेर आफूहरू लागिपरेको जानकारी गराए । 


Advertisement

महासंघका अध्यक्ष गोल्छाले निजी क्षेत्रका व्यावसायिक संस्थाबीच प्रस्तावमा सम्झौता गरेर जिल्ला नगरमा लैजाने बताउँदै त्यसले साना तथा मझौला उद्योग व्यवसायको समस्या समाधान हुने विश्वास व्यक्त गरे  ।

उनले महासंघले विज्ञ सहितको राहत सेल बनाउन लागेको जानकारी गराउँदै विशेषगरी बैंकिङ, राजस्व, श्रमको समस्यामा परेका व्यवसायीलाई राहतको काम गर्ने उल्लेख गरेका छन् ।

मेलमिलाप केन्द्र बनाउन लागिएको र केन्द्रले उद्योग व्यवसायमा भएका समस्या समाधानको लागि मेलमिलापको काम गर्ने र सर्वोच्च अदालतसँग समन्वय गरेर गरिने केन्द्रको निर्णयलाई मुद्दा सर्वोच्चमा गए पनि अदालतले समेत त्यसलाई हेर्ने उल्लेख गरे । 

उनले यस क्षेत्रमा बन्दै गरेको गौतमबुद्ध अन्तर्राष्ट्रिय विमानस्थल, सेजको नियमावली परिवर्तन, मोतिपुर औद्योगिक क्षेत्र लगायतका कारण यस क्षेत्रमा लगानी प्रबद्र्धन गर्ने र रोजगारीको समेत सम्भावना प्रसस्त रहेको औंल्याए  । 

लुम्बिनी प्रदेश योजना आयोगका उपाध्यक्ष डा. ईश्वर गौतमले प्रदेशमै उद्योग दर्ता गर्ने भएपछि दर्ताको संख्या पर्याप्त भए पनि उद्योग सञ्चालन हुन नसकेको बताउँदै त्यसमा समस्या के हुन् सुझाव दिन आग्रह गरे । सरकार निजी क्षेत्रसँग सहकार्य गर्न तयार रहेको बताउँदै उनले उद्योग व्यवसायका समस्या के छन्, त्यसलाई कसरी समाधान गर्न सकिन्छ भनेर बसेर छलफलको लागि समेत आफू तयार रहेको बताए । 

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्