भारतको गुजरात राज्यमा रहेको जामनगर म्युनिसिपल कर्पोरेसन चुनावमा एक उम्मेदवारले कतै पनि प्रचारका लागि नगई खाटमा पल्टिएरै विजय प्राप्त गरेका छन् ।

भारतीय जनता पार्टीका उम्मेदवार गोपाल सोरठियाले वार्ड नम्बर ७ बाट चुनाव जितेका हुन् । 

टिकट पाउनुभन्दा दुई दिनअघि एक दुर्घटनामा परी उनका दुवै गोडा भाँचिएकाले प्लास्टर लगाएर खाटमा बस्नुपरेको थियो । 

यस्तो अवस्थामा उनले घरघर गएर चुनाव प्रचार गर्न सम्भव थिएन । त्यसैले उनले सामाजिक सञ्जालमा आक्रामक रूपमा चुनाव प्रचार गरे र अधिकतम मतदाताकहाँ पुगे । 

उनले आफ्नो भाषण रेकर्ड गरे र १० हजारजनालाई पठाए । ह्वाट्सयापमा नौ हजार मतदातालाई टेक्स्ट मेसेज पठाए अनि ३० हजारजनालाई एसएमएस पठाए । 

‘मतदाताहरू आफूलाई उम्मेदवारले व्यक्तिगत रूपमा आएर भेटे हुन्थ्यो भन्ने चाहन्छन् । तर म हिँडडुल गर्न असमर्थ थिएँ । त्यसैले मैले मतदातासमक्ष पुग्न सामाजिक सञ्जालको सहायता लिएँ र उनीहरूलाई मेरो पक्षमा मतदान गर्न विश्वस्त तुल्याएँ,’ सोरठियाले बताए । 

उनका कार्यकर्ताहरूले उनलाई मतदाताहरूसँग भिडियो कलमार्फत जोडे र उनले तिनीहरूसँग भोट मागे । 
 

सोरठिया सन् २०१० देखि भाजपामा छन् । हुन त उनी वडा नम्बर ८ का निवासी हुन् तर उनले वडा नम्बर ७ को टिकट पाए । 
‘

मेरा लागि नयाँ मतदाता थिए तर सामाजिक सञ्जाल अभियानले काम गर्‍यो,’ उनले बताए ।